Qarashańyraq QazUÝ-dyń 80-jyldyq mereıtoıyna  oraı  jýrnalısıka fakúltetiniń uıytqy bolýymen jáne  «Medıasfera» gýmanıtarlyq zertteýler ǵylymı ortalyǵy, QR BUU Qoǵamdyq aqparat departamentiniń qoldaýymen «Komýnıkasıa – bárine: shyǵarmashylyq ıdeıalar men tehnologıalardy basqarý óneri» atty İ Halyqaralyq Jýrnalısıka jáne Komýnıkasıa  Qysqy  Mektebi ótti. Atalǵan is-shara Almaty oblysy, İle-Alataý memlekettik ulttyq saıabaǵyna qarasty  «Taý-Turan» Bilim berý-saýyqtyrý kesheninde uıymdastyryldy. Jobanyń avtory ári jetekshisi - s.ǵ.d., profesor, «Medıasfera» gýmanıtarlyq zertteýler ǵylymı ortalyǵynyń dırektory Gúlmıra Sultanbaeva sharanyń  maqsaty týraly:  «Jýrnalısıka Qysqy mektebiniń negizgi maqsaty: shyǵarmashylyq ıdeıalar men aqparattyq oqıǵalardy jarıalaý men tanytý barysynda jańa tehnologıalar men ınovasıalyq ádis-tásilderdi paıdalaný,  bilim tolyqtyryp, tájirıbelik daǵdylardy ıgerý bolyp tabylady»,-deıdi. Sharanyń ashylý saltanatynda Almatydaǵy IýNESKO-nyń klasterlik búrosynyń basshysy Vlastımıl Samek myrza qatysýshylarǵa sáttilik tilep, bilim jetildiretin osyndaı mektepterdiń ótýi jastardyń jan-jaqty maman bolyp qalyptasýyna paıdasynyń kóp ekendigin aıtyp ótti.

     Jalpy, Qysqy mektepke «jýrnalısıka», «halyqaralyq jýrnalısıka», «qoǵammen baılanys ornatý», «aqparattyq júıeler», «matematıkalyq jáne kompúterlik úlgileý», «mádenıettaný», «saıasattaný» mamandyqtary boıynsha ál-Farabı atyndaǵy QazUÝ, Turan ýnıversıtetiniń stýdentteri jáne qalalyq №2 Daryndy balalar mektebiniń oqýshylary qatysty. Qysqy mektep jumysy úsh kún boıy shyǵarmashylyqpen aınalysatyn jastarǵa arnalǵan arnaıy baǵdarlama boıynsha júrgizildi.

Qysqy mektep jumysy barysynda dárister oqylyp, keısterdiń sheshimderin tabý joldary qarastyryldy.  Jeke jáne toptyq tájirıbelik sabaqtar ótkizildi, kásibı keńester berildi.

Sheberlik saǵattaryn elimizge tanymal mamandar men profesor, ǵalymdar júrgizdi.  Máselen, Ybraeva Ǵalıa – s.ǵ.d., profesor, ál-Farabı atyndaǵy QazUÝ Birinshi Prorektor Keńesshisi, Ahmetova Láılá –  t.ǵ.d., ál-Farabı atyndaǵy QazUÝ IýNESKO ortalyǵynyń dırektory, Abazov Rafıs – PhD, ál-Farabı atyndaǵy QazUÝ shaqyrylǵan dárisker, Kolýmbıa ýnıversıtetiniń profesory, AQSH, Velıchenko Svetlana – f.ǵ.k., ál-Farabı atyndaǵy QazUÝ  dosenti,  «Bilim» telearnasynyń redaktory, Kákibalanov Serikqazy – Ulttyq  Internet Asosıasıasynyń Prezıdenti, Ábdiraıym Asylhan – ál-Farabı atyndaǵy QazUÝ aǵa oqytýshysy, «FOTOÓNER» qoǵamdyq birlestiginiń tóraǵasy, Lojnıkova Olga –   ál-Farabı atyndaǵy QazUÝ aǵa oqytýshysy, Danchenko  Anna –  ál-Farabı atyndaǵy QazUÝ PhD doktoranty,  «31» telearnasynyń prodúseri, Qalymbet Azamat – telejýrnalıst, «Qazavtojol» AQ baspasóz-hatshysy, Buharbaev Muhamedáli – «Qazaq radıosynyń» saıası sholýshysy, Azanbek Erbol – AQ KaspiBank PR-menedjeri, Ámirjan Lázzát – «Woolim Construction» qoǵammen baılanys, BAQ jáne jarnama departamentiniń basshysy t.b. kásibı mamandar sabaq ótkizdi. Qarastyrylǵan taqyryptar aıasynda «Jańalyq jazýdy neden bastaý kerek?», «Fotosýret jáne beıne materıaldarmen jumys», «Jýrnalısiń ınternet quraldary», «Radıo jáne dybyspen jumys», «Medıa-zańnama jáne etıka», «Vızýalızasıa nemese modeldeý», «Daralyq jáne derbestik», «Sandyq dáýirdegi jýrnalısıka» máseleleri talqylandy. Sonymen qatar  ádistemelik jınaq jaryq kórdi.

Barlyq qatysýshylarǵa biliktilikti arttyrý kýrsyn támamdaǵany týraly kýálik berildi.

Qoryta aıtqanda, Qysqy jýrnalısıka mektebiniń jastarǵa berer paıdasy mol boldy. Kásibı mamandarmen birlesken jobalar jasaý múmkindikteri týyndady. Shyǵarmashyl jastardyń shabyttary shalqyp, oı-armandary alysqa sharlap ketti desek artyq aıtpaǵan bolar edik.

Áıgerim Álimjan