Ýkraına soty 23 jastaǵy qazaqstandyq  Shyńǵys Seıpıevti "áskerge jaldaný qylmysyna" qatysty is boıynsha toǵyz jylǵa sottady. Bul týraly Gratı ýkraın basylymy sot úkimine súıene otyryp habarlady.

İs materıaldaryna sáıkes, 2022 jylǵy qazanda Seıpıevti "Vagner" jekemenshik áskerı kompanıasy Ýkraınaǵa qarsy soǵysýǵa kóndirgen. 18 qarashada ony ushaqpen Túmennen Rostov oblysyna jetkizgen. Sol jerde ol kelisimshartqa qol qoıǵan. Áskerı kompanıa oǵan aı saıyn 200 myń rúbl tóleýge ýáde bergen. Seıpıev aqshany kelisimshart merzimi aıaqtalǵan soń alýǵa tıis bolǵan.

Jeltoqsannyń basyna deıin Seıpıev áskerı daıyndyqtan ótken, odan soń Lýgansk oblysynyń Kremennaıa qalasyna barǵan. 24 jeltoqsanda ony Donesk oblysy Bahmýt aýdanynyń Iakovlevka aýylyna jibergen. Sol jerde ol bir apta soǵysqan, al 30 jeltoqsanda tutqynǵa túsken.

Tergeýdi Ýkraına qaýipsizdik qyzmeti júrgizgen. Tergeý nusqasyna qaraǵanda, Seıpıevti Túmendegi №2 kolonıada soǵysqa barýǵa úgittegen. Ol Reseıde zorlaý qylmysy boıynsha 10 jylǵa sottalyp, dál sol ýaqytta jazasyn ótep júrgen. "Vagner" áskerı kompanıasymen jasalǵan kelisimshart boıynsha oǵan syıaqy tólenip, qylmystyq jazadan bosatý týraly jazylǵan.

"Vagner" áskerı kompanıasy 2022 jylǵy jazdan beri kolonıada jazasyn óteýshilerdi soǵysqa úgitteýmen aınalysyp kelgen. Kompanıanyń negizin qalaǵan Evgenıı Prıgojın kolonıalardy ózi aralap, asa aýyr qylmys jasaǵandardy Ýkraınaǵa qarsy soǵysýǵa kóndirgen. Alaıda 2023 jylǵy aqpanda Prıgojın sottalǵandardy úgitteý toqtady dep málimdegen.

Qańtardyń basynda Prıgojın birinshi top raqymshylyqqa ilingenin habarlaǵan. "Agentstvo" basylymy men BBC Orys qyzmetiniń jýrnalıseri raqymshylyq alǵandar arasynda urlyq-qarlyq, esirtki saýdasy, kisi óltirý qylmystary úshin sottalǵandar bar ekenin anyqtaǵan.

Mamyrda "Vagner" jekemenshik áskerı kompanıasy Ýkraınadaǵy soǵysta 20 myń jaldamaly jaýynger opat bolǵanyn, onyń jartysy sottalǵandar ekenin málimdegen.

Derekkóz: Azattyq radıosy