Sybaılas jemqorlyqqa qarsy is-qımyl agenttigi Dáýren Abaev Mádenıet jáne sport mınıstri bolyp turǵan kezdegi zań buzýshylyqtardy teksere bastaǵan, dep habarlaıdy KazTAG. 

"Antıkor Dáýren Abaev Mádenıet jáne sport mınıstrligi bolyp turǵan kezdegi zańsyzdyqtardy tekserip, nazar aýdara bastady. Qazir 2022 jyly "Eýrazıa" halyqaralyq kınofestıvaline qatysty tekseris jumystaryn júrgizýde", - dep jazady derekkóz. 

Atalǵan aqparatqa qatysty redaksıa saýalyna Antıkor qysqa jaýap qaıyrǵan. 

"Sybaılas jemqorlyqqa qarsy is-qımyl agenttigi Mádenıet jáne sport mınıstrliginiń laýazymdy tulǵalaryna qatysty birqatar qylmystyq isti tergep jatyr", delingen Antıkor jaýabynda. 

Eske salsaq, Dáýren Abaev 2022 jyldyń qańtarynan 2023 jyldyń qańtaryna deıin Mádenıet jáne sport mınıstri qyzmetin atqardy. Bıylǵy jyldyń naýyryzynan bastap TMD Bas hatshysynyń orynbasary laýazymynda. Qazir D.Abaev qyzmet babyna baılanysty Belarýs astanasy Mınskide turady.