Búgin Almaty garnızonynyń áskerı soty qańtar oqıǵasynda oqqa ushqan otbasynyń isine baılanysty sot úkimin shyǵardy. Sotta Nurbolat Seıitqulov pen Altynaı Etaeva jáne olardyń 15 jastaǵy qyzy Nuraı Orazhannyń ólimine qatardaǵy jaýynger Danıar Egembaev kináli dep tanylǵan. Ol 7 jylǵa bas bostandyǵynan aıyryldy. 

Sottalýshy Egembaevtyń anasy Aıaýjan Egembaeva "ulym buıryqty oryndaýshy ǵana, onyń qasynda 12-13 áskerı qyzmetker bolǵan" dep málimdedi. 

"Jalǵyz meniń ulymdy kináli etkeni ádiletsizdik. Onyń qasynda tájirıbeli áskerı qyzmetkerler, ofıserler, ishki ister organynyń arnaýly jasaǵy boldy. Solardyń bárin sotqa ákelý kerek edi. Ulyma buıryq bergen komandır de joq. 12-13 adamnyń ishinen tájirıbesi joq, 21 jastaǵy meniń ulymdy ǵana kináli etip otyr. Buıryq bergen adamdar jaýapqa tartylýǵa tıis. Sotta 57 oq atylǵany aıtyldy. Sonyń ishinde meniń balamnyń 2 oǵy ǵana dáleldenip otyr. Apelásıalyq shaǵym túsiremiz, isti qaıta tergeýdi talap etemiz" degen sottalýshynyń anasy Azattyq radıosyna. 

Al marqum Seıitqulovtyń ápkesi, jábirlenýshi Darıǵa Dáýitálıeva "Seıitqulovtarǵa 120 oq atylǵan" dep habarlady. 

"Sot Nurbolat pen Nuraıdyń basyna tıgen oqtardy ǵana dáleldendi dep otyr. Olarǵa 120 oq atylǵan. Biraq bir adam ǵana kináli bop shyqty. Atqan adamnyń bári jaýapqa tartylýǵa tıis edi" - dedi Dáýitálıeva.