Qylmystyq top messendjer arqyly Astana, Kókshetaý jáne Qaraǵandyda esirtki ótkizý arnasyn jolǵa qoıǵan, - dep habarlaıdy  Polisia.kz.

Uıymdasqan qylmystyq toptyń múshelerin polıseıler "Suńqar" jáne jyldam qımyldaıtyn arnaıy jasaq bólimshelerimen birlesip, bıyl sáýirde ustaǵany aıtyldy.

"Úsh qalada 11 qylmysker ustalyp, toǵyz mekenjaı boıynsha qyzmettik-izdestirý ıtterin tarta otyryp tintý júrgizilgen bolatyn. Tergeý barysynda uıymdasqan qylmystyq toptyń árbir qatysýshysy esirtkini býyp-túıý, saqtaý, tasymaldaý nemese taratý, toptyń aqshalaı kiristeri men shyǵyndaryn baqylaý sıaqty naqty rólderdi oryndaǵany dáleldendi.

Osylaısha, qylmyskerlerdiń biri qylmystyq bıznespen qamtylǵan qalalar boıynsha esirtkiniń asa iri partıalaryn saqtaýǵa jáne tasymaldaýǵa jaýapty boldy. Al ekinshisi qarjylyq kirister men shyǵyndardy baqylaý úshin toptyń múshelerine "jalaqy" tóleýmen, "joǵalǵan" esirtkiler úshin aıyppuldar salýmen aınalysqan", - delingen habarlamada.

Qylmystyq top músheleriniń biri esirtki satylatyn ınternet-arnalardyń jumysyn qamtamasyz etken. Sondaı-aq, ol jańa klıentterdi belsendi túrde tartýmen aınalysyp, onlaın-konkýrstar, utys oıyndary men aksıalar ótkizgen.

"Top músheleriniń biri kámeletke tolmaǵan kolejdiń ekinshi kýrs stýdenti ekenin aıta ketken jón. Zańsyz aınalymnan úsh keli esirtki tárkilendi. Qylmystyq iske zattaı dálel retinde ulttyq jáne shetel valútasyndaǵy qarajat, qylmystyq árkette paıdalanylǵan uıaly telefondar, noýtbýkter, sım-kartalar qosa tirkeldi", - delingen habarlamada.

Esirtki satatyn úsh ınternet-dúkenniń jumysy toqtatyldy.

"Uıymdastyrýshyǵa jáne esirtki bıznesine qatysýshylarǵa asa iri mólsherde esirtkiniń zańsyz aınalymynan basqa QR QK-niń 262-shi "Uıymdasqan topty qurý, oǵan basshylyq etý jáne qatysý" baby boıynsha aıyp taǵylyp otyr. Múlki tárkilenip, on eki jylǵa deıin bas bostandyǵynan aıyrý jazasy kózdeledi", – dedi QR İİM esirtki qylmysyna qarsy is-qımyl departamenti bastyǵynyń orynbasary Asqar Muhametqalıev.