Shyǵys Qazaqstan oblysy Maraldy aýylynyń turǵyndary Indýstrıa jáne ınfraqurylymdyq damý mınıstri Marat Qarabaevpen kezdesý úshin Astanaǵa keldi.
Turǵyndar birneshe jyldan beri aýyl mańynda altyn fabrıkasynyń salynýyna qarsy kúresip keledi. Bul týraly Ulysmedia.kz portaly habarlady.
Olar fabrıkanyń Maraldy ózeniniń jaqyn ornalasatynyna narazy. Óndiris orny jergilikti halyqtyń densaýlyǵyna zalalyn tıgizip, Qyzyl kitapqa engen tabıǵı qoryqty, ósimdikterdi, janýarlar men qustardy joıyp jiberedi dep qarsy bolyp otyr.
Aýyl turǵyndarynyń aıtýynsha, shaǵymdaryn barlyq mekemege jetkizgen. Alaıda eshkim ony elemeı, sheneýnikter bir-birine silteı bergen. Búgin olar eki jyldan beri jalǵasyp kele jatqan daýdyń sheshimin tabý úshin, IIDM basshysymen betpe-bet júzdesýge elordaǵa kelgen.
Pikir qaldyrý