Astanadaǵy qylmystyq ister jónindegi sot alqasy reseılik gaz baǵasy týraly málimet kórsetilgen qujattyń túpnusqasy bolmaǵandyqtan qazaqstandyq kásipker Qaırat Boranbaevtyń úkiminiń kúshin joıdy.
Sot úkimi osy jyldyń 31 naýryzynda jarıalanǵan. Sol kezde sot birinshi prezıdenttiń burynǵy qudasy Qaırat Boranbaev pen onyń bıznestegi seriktesi Roman Nahanovty, sondaı-aq "Qazaq Gaz" AQ basqarma tóraǵasynyń burynǵy orynbasary Taıyr Januzaqty 8 jylǵa bas bostandyǵynan aıyrdy.
"Qaztransgaz" AQ-ǵa Reseı tarapynan usynylǵan gaz baǵasy týraly bastapqy derekterdiń bolmaýy úkimniń kúshin joıýǵa sebep boldy.
"Úkim "Gazprom" JSHQ men "QazMunaıGaz" AQ arasynda 12.07.2019 jylǵy kezdesý hattamasy bolǵan degen boljamǵa negizdelgen. Ol qujattyń 18-tarmaǵynda myń tekshe metr gaz úshin satý baǵasy 145 AQSH dollary dep belgilengen. Baǵadaǵy aıyrma gaz baǵasyn joǵarylatý arqyly jymqyrý retinde qarastyryldy. Alaıda bul hattamanyń túpnusqasy joq. Hattamada qol qoıǵan tulǵalardyń aty-jóni kórsetilmegen", - dep jazylǵan Astana sotynyń qylmystyq ister jónindegi sot alqasynyń qaýlysynda.
"Aıyptaý tarapynyń boljamy boıynsha, hattamaǵa qol qoıdy degen tulǵalardan is boıynsha jaýap alynbady jáne bul qujattyń bar ekeni rastalmady. "Qaztransgaz" AQ qyzmetkerleriniń habarlamalarynan alynǵan osy hattamanyń elektrondy kóshirmesi onyń shynaıylyǵyn dáleldeý úshin jetkiliksiz", - dep tolyqtyrdy sottaǵylar.
İste 17 tarmaqtan turatyn dál sol kúngi hattamanyń túpnusqasy bar, gazdy 145 dollardan satý týraly 18-shi tarmaq onda joq. Nelikten bir kúni birdeı eki hattamanyń bar ekeni belgisiz: bireýi shynaıy, al ekinshisi orta býyndaǵy menedjerlerdiń elektrondyq hat almasýlarynan jáne oǵan naqty kim qol qoıǵany belgisiz.
"Osylaısha, sot úkimi qylmystyq is júrgizý zańnamasyn buzýmen shyǵaryldy, sottyń kiná týraly tujyrymdary boljamǵa negizdelgen, qujattardyń túpnusqalary bolmaǵan jaǵdaıda, olardyń senimdiligi men durystyǵyna kúmán týdyratyn kóshirmeleri negizge alynǵan, jol berilmeıtin dáleldemeler jáne taldanbaǵan, shynaıylyǵy boıynsha salystyrylmaǵan jáne basqa ádil dáleldemelermen rastalmaǵan dáleldemeler qoldanyldy", - dep qorytyndylady sot alqasy.
Olardyń sheshimimen qylmystyq is birinshi satydaǵy sottyń qaýlysy boıynsha apelásıalyq tártipte qaralady. Sottalǵandar qamaýda qalady. Sottalǵandar men olardy qorǵaýshylardyń apelásıalyq ótinishteri ishinara qanaǵattandyrylady.
Pikir qaldyrý