Mańǵystaý oblysynyń strıtvorkaýt jáne strıtlıftıng boıynsha federasıasynyń prezıdenti, eki ret Gınnestiń rekordtar kitabyna engen, strıtlıftıng pen strıtvorkaýttan álem chempıonattarynyń jeti medaliniń ıegeri Ildar Iagáev tabys tabý úshin Anglıaǵa kóshken, dep jazady Lada.kz. 

28 jastaǵy Aqtaý turǵyny qazir Anglıadaǵy egistikten qyryqqabat pen brokkolı terip jumys istep júr.  Sportshynyń aıtýynsha, egistiktegilerdiń jumysy kúnine 8-9 saǵatqa sozylady. Al tańǵy 4:00-t de traktor róline otyratyn Ildardyń jumysy túske taman aıaqtalady. Ol teńiz jaǵasyndaǵy tórt qabatty úıde basqa jumysshylarmen birge turatynyn aıtty. 

"Men ótinish bergen kezde maǵan jumys isteıtin oryndardyń tizimi berildi. Qyryqqabat ósetin alqapty ádeıi tańdadym, ony jınaý qulpynaıǵa qaraǵanda qıynyraq. Sportshy retinde ózimdi synap kórgim keldi. Bul negizi er azamattarǵa arnalǵan jumys. Komandamyzda bir ǵana tarazdyq áıel bar", deıdi ol. 

Atalǵan jumys ornynda jalaqyny apta saıyn beredi. Al jalaqy kólemi jumys istegen saǵatyna baılanysty ózgerip otyrady. 

"Aıyna shamamen 2000 fýnt, teńgege almastyrǵanda mıllıon teńge shyǵady. Mundaı jalaqyny Qazaqstanda tabýym ekitalaı. Múmkin birneshe jerde jumys istep, kúnine 2-3 saǵat uıyqtap mıllıon teńgeni áreń tabatyn edim", deıdi Ildar.

Ildar Anglıaǵa kóshkeni týraly kóp tanystarynyń biletinin aıtty. Jaqyndarynyń bir bóligi onyń bul sheshimin qoldasa, biri qarsylyq bildirgen. Sebebi kóbi joǵary bilimi bar azamattyń egistikke jumys isteýin uıat sanaıdy. Al Ildar Iagáevtiń eki joǵary bilimi bar. 

"Kópshiliktiń pikirin elemesten sheshim qabyldadym. Ózimniń otbasym úshin, bolashaǵym úshin shetel astym. Aqtaýda sportty damytý úshin birneshe ret áreket jasadym. Alaıda barlyǵy nátıjesiz boldy. Meni sport basqarmasy tyńdamady. Túrli jarystarda jeńiske jetip, kók týdy jelbirettim. Alaıda meni aeroporttan kútip alǵysy kelmedi. Sheneýnikter únemi sportshylarǵa qoldaý kórsetý keregin aıtyp jatady. Bizdiń elde tek boksshylar, fýtbolshylar jáne kúrespen aınalysatyndarǵa ǵana kóńil bólinedi. Al qalǵandaryna túkirgeni bar", dep aıtty sportshy. 

Ildar traktorshy bolyp isteıtin qazaqstandyqtar kóp ekenin de jetkizdi.

"Jumys isteýge ruqsat alty aıǵa ǵana beriledi. Kóptegen qazaqtar nesıesin tolyq ótep úlgerdi. Bireýler kólikke, endi bireýler páter alý úshin aqsha jınaıdy. Aıtpaqshy, munda nebári bir aıda kólik satyp alýǵa bolady. Anglıada jumys istegisi keletinderdiń kóptigi sonsha, jumysqa ótinimderdi qabyldaý qazirdiń ózinde toqtatyldy. Eger vızalyq rejım bolmasa, men munda ne bolar edi dep elestete almaımyn. Men balalarymnyń osynda turǵanyn qalaımyn. Óıtkeni, olardyń bolashaǵyn Qazaqstanda kórmeımin", - deıdi Ildar.