Kórnekti qazaqstandyq ǵalym, Ekonomıkalyq zertteýler ınstıtýtynyń ańyz adamy, ekonomıka ǵylymdarynyń doktory, profesor, akademık, elimizdegi ekonomıkalyq-matematıkalyq modeldeýdiń ǵylymı baǵytyn jasaýshy 85 jastaǵy Saılaý Baızaquly Baızaqov dúnıeden ótti - dep habarlaıdy Ulttyq ekonomıka mınıstrliginiń baspasóz qyzmeti.

Jarty ǵasyrdan asa nátıjeli ǵylymı qyzmetinde Saılaý Baızaqov ekonomıka ǵylymdarynyń 30-dan asa doktory men 100-ge jýyq kandıdatyn qosa alǵanda, ekonomıserdiń tutas bir pleıadasyn tárbıelep, ósirdi, olardyń kópshiligi áli kúnge deıin memlekettik basqarý organdarynda joǵary basshylyq qyzmetterde jumys isteıdi.

Saılaý Baızaqov 1937 jyly Qostanaı oblysy Jangeldın aýdany Qyzbel aýylynda týǵan. Ol - ekonomıka ǵylymnyń doktory, profesor.

1964-1976 jyldar aralyǵynda - Ekonomıkalyq zertteýler ınstıtýtynyń kompúterlik baǵdarlamalyq qamtamasyz etý bóliminiń meńgerýshisi.

1976-1985 jyldar aralyǵynda - Ekonomıkalyq zertteýler ınstıtýty dırektorynyń orynbasary.

1986-1993 jyldar - Menedjment ǵylymı-zertteý ınstıtýtynyń dırektory.

1994-1995 jyldar aralyǵynda - Qazaqstan Respýblıkasynyń Baǵaly qaǵazdar jónindegi ulttyq komısıasy Joǵarǵy keńesiniń bas sarapshysy.

1996-1999 jyldar - Qazaqstan Respýblıkasy Úkimetiniń janyndaǵy Memlekettik qyzmetshilerdiń biliktiligin arttyrý ınstıtýtynyń dırektory.

1999-2002 jyldar aralyǵynda - Tacis EDKZ 9602 jobasynyń jergilikti keńesshileriniń jetekshisi.

2003-2004 jyldar aralyǵynda - Klımattyń ózgerýin úılestirý ortalyǵynyń makroekonomıkalyq tobynyń jetekshisi.

2004-2008 jyldar aralyǵynda - "Ekonomıkalyq zertteýler ınstıtýty" AQ ǵylym jónindegi vıse-prezıdenti.

2008-2010 jyldar aralyǵynda - "Ekonomıkalyq zertteýler ınstıtýty" AQ ǵylymı dırektory.

2010 jyldan qazirgi ýaqytqa deıin "Ekonomıkalyq zertteýler ınstıtýty" AQ ortalyǵynyń ǵylymı jetekshisi - dırektory.

150-den asa jarıalanymdary bar, onyń ishinde naryqtyq ekonomıka, makroekonomıkalyq boljaý, saýda saıasatyn taldaý, 50-den astam oqý materıaldary.