Almaty qalasyndaǵy aýrýhanada naýqastardyń adamnyń ımýndyq tapshylyq vırýsyn (AITV/VICH) juqtyryp alýyna baılanysty epıdemıologıalyq tergeý nátıjesi kelesi aptada belgili bolady. Bul týraly Densaýlyq saqtaý mınıstri Ajar Ǵınıat aıtty.

"Komısıa kelesi aptada jumysyn aıaqtap, bárin biletin bolamyz. Ázirshe olar jumys istep jatyr. Komısıa jumysyn aıaqtaı salysymen olar tolyq anyqtama daıyndap, ony ákimdik pen Densaýlyq saqtaý mınıstrligine resmı usynady", - dedi Ajar Ǵınıat Úkimet otyrysynan keıin BAQ ókilderiniń saýalyna oraı.

Onyń atap ótýinshe, dárigerlik qupıa týraly qoldanystaǵy zańnamaǵa sáıkes, tergeý júrip jatqan ýaqytta pasıentterdiń kelisiminsiz olarmen kezdesýge eshkimniń quqy joq.

"Dárigerlik qupıa bar. Pasıenttiń kelisimimen ǵana bolady. Olardyń kezdesýge nıeti joq", - dedi mınıstr.

Buǵan deıin Almaty qalalyq ortalyq klınıkalyq aýrýhanasynda jatqan 3 naýqastan adamnyń ımýndyq tapshylyq vırýsy anyqtalǵanyn jazǵan edik.