Almaty turǵyndary qala ákiminen megapolıstiń eki negizgi dańǵyly nelikten bir mezgilde jóndeýge jabylǵanyn surady.

Bul másele Erbolat Dosaevtyń Bostandyq aýdanynyń turǵyndarymen kezdesýinde kóterildi.

"Qazir barlyq almatylyqtardy tolǵandyratyn suraq, nelikten eki negizgi jol - Ál-Farabı men Abaı kósheleri bir mezgilde jabyldy? nege aınalma joldar nemese basqa qozǵalys baǵyttary jasalmady? Eń mańyzdysy, munyń bárin qashan aıaqtaıdy?" – dep surady qala turǵyndary.

Osyǵan jaýap retinde Erbolat Dosaev bul dańǵyldardyń 2010 jáne 2012 jyldan beri jóndeý kórmegenin eske saldy. Ákimniń aıtýynsha, bıyl jaz mezgili asfálttardyń jol qozǵalysyna tótep berý ýaqytynyń sońǵy kezeńi eken.

"Eger meniń sheshimderim bireýlerge qolaısyzdyq týǵyzsa, Bostandyq aýdanynyń turǵyndarynan ǵana emes, búkil Almatynyń turǵyndarynan ózim jáne ákimdik atynan keshirim suraǵym keledi. Biraq ókinishke qaraı, úlken megapolısterdi damytý máseleleri, tek Almaty ǵana emes, jol ınfraqurylymyn retke keltirýge baılanysty bolyp otyr.

Nelikten biz bıyl eki negizgi joldy bastadyq? Burynǵy sózimde aıtqanymdaı, Ál-Farabı kóshesi 2010 jyldan beri, Abaı kóshesi 2012 jyldan beri jóndeý kórmegen. Kádimgi kúrdeli jóndeý sıkli bes jyldan, keıde jeti jylǵa deıin. Biz eki kúrdeli jóndeý kezeńin ótkizip aldyq. Mamandardyń aıtýynsha, bıyl osy eki joldy jasamaǵanymyzda, qysta qınalatyn edik. Kelesi jylǵy kóktemde joldyń sapasyna qatysty birneshe másele bar", - dedi Dosaev.

Ol osy dańǵyldardaǵy jóndeý jumystary kezinde aınalma joldardyń bolmaýyna da toqtaldy.

"Eskertýlerimizdi eskerip, aınalma jolmen júrip, kómektesken barlyq basqa turǵyndarǵa alǵysymdy bildiremin, bul da úlken atsalysý, qazirgi jaǵdaıdy túsingeni úshin shyn júrekten alǵys aıtamyn.

Búginde negizgi kólik keptelisi Ál-Farabı – Jarokov kóshelerinde bastaldy. Eger sizben men júretin jol ınfraqurylymyna qarasańyz, onda Dýlatı kóshesinde apattyq joldar joq jáne biz keri qozǵalys jasaı almaımyz. Rozybakıev pen Jarokov kóshelerinde jol aıryǵy qarsy jolaqta qozǵalysty durys uıymdastyrýǵa múmkindik bermeıdi. Sondyqtan keshe alǵashqy múmkindik túsken boıda biz Syrǵabekovten Esentaı kópirine deıingi keri qozǵalysty ashyp, negizgi júktemeni alyp tastadyq. Biz ál-Farabıdiń ońtústik jaǵyn jóndeý kezinde sabaq aldyq jáne osy tájirıbeni soltústik bóliginde de eskeretin bolamyz", - dedi Almaty ákimi.

Sondaı-aq Erbolat Dosaev Ál-Farabı men Abaı dańǵyldaryndaǵy kólik qozǵalysyn saǵat saıyn jeke óz baqylaýynda ustaıtynyn málimdedi