Abaı oblysynda memlekettik baǵdarlama boıynsha berilgen jańa jaldamaly úılerdiń turǵyndary óz ómirleri úshin alańdaıdy. Jańa úıler ómir súrýge jaramsyz bolyp qalǵan. 

Olardyń aıtýynsha, turǵyn úıdegi gıpsokarton qabyrǵalary salbyrap, aıaq astynan eden syrǵyp jatyr. Bul týraly KTK telearnasy habarlady.

Telearna málimetinshe, Kókpekti aýdany ortalyǵynyń shet jaǵynda salynǵan jaldamaly úıler úsh jyl buryn kóp balaly jáne az qamtylǵan azamattarǵa arnalǵan memlekettik baǵdarlama boıynsha salynǵan. Úılerge turǵyndar birte-birte qonystana bastaǵan.

Dese de, baspanaǵa qol jetkizgen kóp balaly analar ózderiniń jáne balalarynyń qaýipsizdigi úshin qorqatynyn aıtady.

"Úıde áreń qystadyq. Úsh ret pesh jarylyp, úsh ret ony aýystyrdyq. Kúıeniń, sýdyń bári osy peshpen aqty... Internet degen múldem joq. Bizde elektr jaryǵy joq,"-deıdi turǵyn Anna Semıletova.

Dál osyndaı baspanaǵa qol jetkizgen taǵy bir kóp balaly otbasy qazir qonaqúıde nemese aýladaǵy kıiz úıde túnep júrgenin jetkizdi. Turǵynnyń aıtýynsha, sapasyz ǵımaratta turýdan qorqady.

Turǵyndardyń aıtýynsha, bul úı syrtynan ádemi kórinedi. Biraq ishinde qurylys normalaryn buzǵan ondaǵan fakti bar.

Sheneýnikter turǵyndardan sabyr saqtaýdy surap, kemshilikter túzetiletinine ýáde berýde.