Shymkentte eki jyl buryn bolǵan qylmystyń beti ashyldy, dep habarlaıdy Polisia.kz. Eńbekshi aýdanynyń turǵyny 2 jyl buryn 32 jastaǵy ulynyń joǵalyp ketkenin aıtyp, polısıaǵa shaǵymdanǵan.
"Anasy er adamnyń eki apta buryn úıden shyǵyp, qaıtyp oralmaǵanyn aıtty. Habar-osharsyz ketken azamattyń júrgen jerin anyqtaý maqsatynda krımınaldyq polısıa qyzmetkerleri keshendi sharalar júrgizdi. Er adamnyń syrtqy kelbetin sıpattaıtyn baǵdarlar qalalyq polısıa departamentiniń basqarmalaryna, sondaı-aq elimizdiń barlyq aımaqtaryndaǵy polısıa bólimderine joldandy", - deıdi vedomstvo.
Alaıda izdeý jumystary nátıje bermegen. Tek 2 jyldan keıin ǵana qylmystyń beti ashylǵan.
"Kezdeısoq kýágerdiń jaýabyna sáıkes, azamattyń joǵalyp ketýine inisiniń qatysy bary anyqtaldy. Otbasylyq janjal kezinde ol ógeı baýyryn armatýramen birneshe ret uryp, óltirgeni anyqtaldy. Ógeı aǵasynyń mas kúıinde anasymen janjaldasatyny ony osyndaı áreketke ıtermelegen. Asa aýyr qylmystyń izin jasyrý úshin qaskúnem máıitti syrttaǵy dárethanaǵa tastap, shuńqyrdy betonmen toltyryp, ústine shaǵyn saraı turǵyzǵan", - deıdi polısıa.
Kúdikti qamaýǵa alyndy. Eńbekshi aýdandyq polısıa bóliminiń tergeýshileri qylmystyq isti sotqa joldady.
Pikir qaldyrý