Ońtústik Koreıanyń Soltústik Cholla provınsıasyndaǵy 25-shi Dúnıejúzilik skaýttar sletiniń ashylý saltanatynda aptap ystyqtan aýyryp qalǵan 108 adam aýrýhanaǵa jetkizildi, dep habarlaıdy Yonhap agenttigi.

"Jastarǵa arnalǵan mádenı Olımpıada" atalǵan Dúnıejúzilik slettiń ashylý saltanaty sársenbi kúni keshke ótti.

Bıyl eldiń ońtústik-batys jaǵalaýyndaǵy is-sharaǵa 158 elden 43 myńǵa jýyq jas skaýt jınaldy.

Uıymdastyrý komıtetiniń málimetinshe, 108 qatysýshy ystyqtan zardap shekti. 31 adam bas aýrýy men ishtiń aýyrýyna shaǵymdanyp, medısınalyq kómek surady. Eki adam áli de medısınalyq mekemelerde emdelýde.

Uıymdastyrý komıteti qosymsha medısınalyq personaldy – 30 dáriger men 60 medbıkeni tartatynyn jáne lagerdegi pasıentterge kútim jasaý úshin tósek sanyn 220-ǵa deıin arttyratynyn aıtty.

Qazirgi ýaqytta munda 70 tósek ornalastyrylǵan.

İs-sharanyń sońǵy bóliginiń aldynda birneshe adam esinen tanyp qaldy. Órt sóndirýshiler is-sharany toqtatýdy talap etti.

Keıinirek uıymdastyrý komıtetiniń ókilderi skaýttardy ádetten qatty ystyqtan qorǵaý úshin qosymsha sharalar qabyldaýǵa ýáde berdi.

Provınsıada ystyq kún raıy slettiń sońyna deıin saqtalady dep boljanyp otyr.

Soltústik Cholla provınsıasynyń 14 aımaǵynda, sonyń ishinde Býanda qatty ystyq bolatyny týraly eskertý jarıalanady.