Soltústik Qazaqstan oblysynyń sybaılas jemqorlyqqa qarsy qyzmeti bilim berý salasynda mıllıondaǵan búdjet qarajattyń urlanǵanyn anyqtady. Bul týraly oblystyq sybaılas jemqorlyqqa qarsy is-qımyl departamentiniń baspasóz qyzmeti habarlady.

Oblystyq sybaılas jemqorlyqqa qarsy is-qımyl departamentiniń basshysy Sergeı Perov  sońǵy jyldary bilim berý salasynda 300-den astam qylmystyq quqyqbuzýshylyq jasalyp, 143 adam sottalǵanyn aıtty. Bilim salasy jemqorlyqtan aldyńǵy úshtikke kirgen.

Onyń aıtýynsha, jappaı jemqorlyq jasaý júıeli problemaǵa aınalyp otyr. Mysaly aýdandyq bilim bóliminiń esepshisi marqumdarǵa jalaqy aýdarǵan. Al balabaqsha esepshisi memleket qarjysyn jeke shotyna aýdaryp alǵan. Keltirilgen zalal – 90 mıllıon teńge.

Árbir fakti boıynsha ishki memlekettik aýdıt departamenti tekserý júrgizedi. Qorytyndysy boıynsha tıisti quqyqtyq baǵa beriletin bolady. Búginde jalpy somasy 50 mıllıon teńgeden asatyn urlyq faktileri boıynsha eki qylmystyq is tirkeldi, - dep atap ótti Sergeı Perov.