FlyArystan áýe kompanıasy áýejaıda halyqaralyq reısterge aqyly tirkeý qyzmetin bir kúnge jetpeı toqtatty.
Loýkoster 3 tamyzdan bastap áýejaıda tirkelý qyzmetin aqyly etken. Osydan keıin áleýmettik jelide áýe kompanıasyn synǵa alǵan adamdar kóbeıdi. Búgin kompanıa aqyly qyzmetti toqtatatynyn málimdedi.
"Ókinishke qaraı, halyqaralyq reısterge arnalǵan qyzmetti iske qosý kezinde loýkoster kútpegen qıyndyqtarǵa tap boldy. Osyǵan baılanysty barlyq másele sheshilgenshe osy qyzmetti engizý jumysy ýaqytsha toqtatyldy. Áýe kompanıasy áýejaıda aqyly tirkeý qyzmetin satyp alǵan jolaýshylardyń aqshasyn qaıtaryp beredi", - delingen resmı habarlamada.
Aıta keteri, onlaın tirkelý qyzmetine qatysty ózgeris bolmaǵan. Ol tegin bolyp qala beredi.
"Bul halyqaralyq saıahattar úshin óte tıimdi tásil. Jazǵy ýaqytta áýejaıda adam kóp. Al onlaın tirkelýdiń arqasynda uzyn-sonar kezekter pen keptelisten qutylýǵa bolady", - deıdi kompanıa mamandary.
Pikir qaldyrý