Jezqazǵan qalasynyń eki turǵynyna qatysty MetaGo qarjy pıramıdasyn jarnamalaý kúdigi boıynsha sotqa deıingi tergep-tekserý bastaldy. 

Qarjylyq monıtorıń agenttiginiń Ulytaý oblysy boıynsha departamenti óńirlik prokýratýranyń úılestirýimen jáne agenttiktiń kóleńkeli ekonomıka salasyndaǵy taldamalyq bólimshelerimen ózara is-qımyly nátıjesinde kúdiktilerdiń qylmystyq áreketi anyqtaldy.

Kúdiktiler MetaGo qarjy pıramıdasynyń qyzmeti týraly aqparattyq resýrstarda (YouTube beınehostıng saıty, Whatsapp jáne Telegram messendjerleri, Facebook jáne Instagram áleýmettik jelileri), sondaı-aq osy qarjy pıramıdasynyń sımvolıkasy bar kıim men plakattardy paıdalana otyryp, halyqpen kezdesýler, jınalystar ótkizgen. 

Osy arqyly 63 mln teńgeden astam somada zalal keltirip, qarjy pıramıdasynyń zańsyz qyzmetine 80-nen astam azamatty tikeleı tartqan. Bul týraly Halyq Uni portaly habarlady. 

Qazir QR QK-niń 217-1-baby (Adamdar tobynyń qarjy pıramıdasyn jarnamalaýy) boıynsha tergeý júrgizilip jatyr.