Uıaly baılanys operatorlary 5G jelisiniń bazalyq stansıalary ornatylǵan qalalardy atady, dep habarlaıdy Sputnik Qazaqstan tilshisi.
"Ksell" AQ basqarma tóraǵasy Asqat Ózbekovtiń aıtýynsha, buǵan deıin 5G jelisinde radıojıilikterdi satý boıynsha aýksıon ótti. Sonyń nátıjesinde árbir kompanıa lısenzıalyq mindetteme aldy.
"Osy mindettemege sáıkes, bes jyldyń ishinde 3 myńnan astam bazalyq stansıa ornatylýy tıis. Bıyl biz úsh respýblıkalyq mańyzy bar qalada 5G jelisin quramyz. Qazirgi kezde 200-den astam bazalyq stansıa Almaty, Astana, Shymkent, Túrkistan jáne taǵy basqa 10 qalada qurylǵan", - dedi Ózbekov ortalyq komýnıkasıalar qyzmetinde ótken brıfıńte.
Al "Mobaıl Telekom-Servıs (Tele2/Altel)" jaýapkershiligi shekteýli seriktestiginiń bas dırektory Sergeı Konkov 5G barlyq oblys ortalyǵynda bolatynyn málimdedi.
"Búginde bizde 5G-di qoldana alatyn barlyq abonenttiń sany shamamen 15 prosentti qurap otyr. Olarda osy jelini ustaı alatyn uıaly telefon bar. Osy kórsetkish aı saıyn ósip jatyr. Biz ol adamdardyń qaıda júrgenin jáne qaı jerde kóp ýaqyt ótkizetinin kórip otyramyz. Soǵan qaraı bazalyq stansıalardy da ornatamyz. Qazirdiń ózinde 5G bar, jeliniń aıasy keńeıip keledi", - dep atap kórsetti Konkov.
Eki kompanıa 5G qoljetimdi ekenin aıtyp otyr. Jeli qaı jerde qosylǵanyn Ksell men Tele2-niń resmı saıttarynda jarıalanǵan kartadan kórýge bolady.
Aıta keteri, buǵan deıin básekelestikti qorǵaý jáne damytý agenttigi 2022 jyldyń sońynda 5G jelisinde radıojıilikterdi bólý boıynsha ótkizilgen aýksıondardyń qorytyndysy naryqtyń monopolıalyq qurylymyn kúsheıtkenin habarlady. Sol kezde "Qazaqtelekom" toby jeńimpaz dep tanylyp, 5G jelisinde qyzmet kórsetý boıynsha 100% monopolıany aldy. Oǵan Ksell men Tele2 kiredi.
Pikir qaldyrý