Qazaqstan Respýblıkasy zańynyń jobasynda zeınetaqy mólsheri, eń tómengi kúnkóris deńgeıi men AEK kólemi kórsetilgen.  Qujat «Ashyq NQA» portalynda jarıalandy.

Zań jobasyna sáıkes, 2024 jyldyń 1 qańtarynan bastap tómendegideı soma josparlanyp otyr:

• eń tómengi jalaqy – 70 000 teńge;
• memlekettik bazalyq zeınetaqy tóleminiń eń tómengi mólsheri – 28 215 teńge;
• eń tómengi zeınetaqy – 57 853 teńge;
• aılyq eseptik kórsetkish – 3692 teńge;
• bazalyq áleýmettik tólemderdiń mólsherin esepteý úshin eń tómengi kúnkóris deńgeıi – 43 407 teńge.

Sondaı-aq jasyna jáne eńbek ótiline baılanysty zeınetaqy tólemderi 9,0%-ǵa arttyrylýy múmkin.

Sonymen qatar qujatta 2024 jylǵa arnalǵan áleýmettik medısınalyq saqtandyrý qoryna tólenetin mindetti áleýmettik medısınalyq saqtandyrý boıynsha memlekettik jarnalardyń mólsheri belgilengen. Ol memlekettik jarnalardy esepteý obektisiniń 1,9%-yn quraıdy.

«Sondaı-aq 1 qańtardan bastap áskerı qyzmetshilerge (merzimdi qyzmettegi áskerı qyzmetshilerden basqa) jáne arnaýly memlekettik jáne quqyq qorǵaý organdarynyń, memlekettik feldegerlik qyzmettiń qyzmetkerlerine turǵynjaıdy kútip-ustaýǵa jáne komýnaldyq qyzmetterge aqy tóleýge aqshalaı ótemaqynyń aılyq mólsheri 3 739 teńge somasynda belgilendi», - delingen qujatta.