Jambyl oblysynda áskerı boryshy óteýge ketken sarbaz komaǵa túsken. Sarbazdyń kóz janary semip, ózge de aǵzalary syr bergen.

Ulttyq qaýipsizdik komıtetine qarasty shekara qyzmetiniń Jambyl oblysyndaǵy basqarmasynda áskerı boryshyn ótep jatqan Ahmetáli Jádigerdiń densaýlyǵyna qaýip tónip tur. Bul týraly Informbúro jańalyqtar qyzmetine silteme jasap, informburo.kz portaly habarlady.

Áskerge barǵanyna bir aı bolmaı jatyp aýrýhanaǵa túsken sarbazdyń jaǵdaıy aýyr. Sarbazdyń anasy bul jaǵdaıǵa "bolmashy aýrýdy asqyndyryp alǵan áskerı bólimniń dárigerleri kináli" dep espteıtinin aıtty.

Sarbazdyń aýrýy angınadan bastalǵan. Aýrýy asqynnan keıin komaǵa túsip, Almatydaǵy áskerı gospıtálǵa aýystyrǵan. Onda da jaǵdaı ýshyǵyp, terisi shirip, ókshesi tesilip qalǵan. Sarbaz kózine ota jasatyp, qazir kardıologıalyq bólimge aýysqan.

Al áskerı bólim basshylary gospıtálǵa jetkennen keıin sarbazdyń ómirine jaýap bermeıtinin aıtyp otyr.