"ArselorMıttal Temirtaý" shahtasynda órt sóndirý jumystary áli de júrip jatyr. Tótenshe jaǵdaılar mınıstri Syrym Sháriphanov órttiń qashan tolyq sóndiriletinin tap basyp aıta almaıtynyn málimdedi.
Mınıstr bastapqyda shahtada transporterlik taspa janyp, odan ot kómir qabattaryna jaıylǵanyn habarlady. Sol sebepti órt sóndirý jumystary uzaqqa sozylǵan. Bul týraly Ulysmedia.kz basylymy jazdy.
"Órtti sóndirý ońaı másele emes, qutqarýshylar tynys alýǵa jaramsyz ortada, joǵary temperatýrada jumys istep jatyr. Bul jer betindegi emes órtti sóndirý. Shahtada bul óte qıyn, arnaıy tehnologıalar, erejeler bar", - dedi ol.
Eske sala keteıik, 17 tamyzda "ArselorMıttal Temirtaýǵa" qarasty "Qazaqstan" shahtasynda konveıer lentasy órtendi. Órt kezinde jer astynda barlyǵy 227 jumysshy bolǵan.
Shahtadaǵy órtten shyǵa almaı qalǵan bes kenshi qaza taýyp, "ArselorMıttal Temirtaý" aza tutý kúnin jarıalaǵan bolatyn.
Pikir qaldyrý