Búgin Parlament Májilisiniń Spıkeri, «AMANAT» tóraǵasy Erlan Qoshanov partıanyń Respýblıkalyq qoǵamdyq qabyldaý bólmesinde azamattardy jeke qabyldady.

Elimizdiń ár óńiriniń turǵyndary ınfraqurylymdy damytýǵa, taza aýyz sýmen qamtamasyz etýge, erekshe qajettilikteri bar adamdardy qoldaýǵa qatysty jáne basqa da máselelermen «AMANAT» partıasyna júgindi.

Máselen, Shyǵys Qazaqstan oblysyndaǵy Altaı qalasynyń 40 myń turǵyny atynan habarlasqan bir top azamat Osınov asýyn aınalyp ótetin jańa jol salý máselesin kóterdi. Onda jyl saıyn myńdaǵan týrıs keledi.

 «Altaı jáne shekara mańyndaǵy Katonqaraǵaı aýdandarynyń turǵyndary úshin bul joldyń mańyzy zor. Mundaǵy qurylys 2018 jyly bastalǵan edi, biraq keıin tolyǵymen toqtap qaldy. Memlekettik orman qorynan jer telimderin berý jumystary keshiktirilýine baılanysty joldy jóndeýge qajet materıaldar qymbattap ketti. Sizden joldy jóndeý jumystaryn tezdetýge kómek kórsetýińizdi suraımyz», – delingen azamattardyń ujymdyq úndeýinde.

Erlan Qoshanov partıa fılıalyna Indýstrıa jáne ınfraqurylymdyq damý mınıstrligimen jáne Shyǵys Qazaqstan oblysynyń ákimdigimen birlese otyryp, jol qurylysyna qajetti barlyq jer telimin berý máselesin tez arada sheshýdi tapsyrdy. Sondaı-aq qajetti qarajatty bólýdi jedeldetý kerek ekenin aıtty.

«Memleket basshysy Qasym-Jomart Toqaev shekara mańyndaǵy óńirlerdi damytýǵa erekshe nazar aýdaryp, ishki týrızmdi damytýǵa barlyq jaǵdaı jasaýdy tapsyrdy. Bul oraıda atalǵan  máseleler osy joldy jóndeýge tikeleı qatysty bolyp otyr. Mundaǵy jumys bastalyp ta ketken. Sondyqtan bul máseleni qysqa merzimde sheshý kerek», – dedi partıa Tóraǵasy.

Al Aqtaý qalasynyń turǵyny Aısulý Qurmanǵazıeva men kúıeýi Jalǵas Kývatov kásipkerlikpen aınalysyp, saýda pavılonyn ashýdy josparlap otyr. Ekeýi de ekinshi toptaǵy múgedek.

«Bizge jumysymyzdy bastaý úshin ruqsat alýǵa járdemdesýińizdi jáne materıaldyq turǵyda kómek kórsetýińizdi suraımyz», – dedi Aısulý Qurmanǵazıeva.

Erlan Qoshanov partıanyń óńirlik fılıalyna ótinish berýshilerge barynsha kómek kórsetýdi tapsyrdy. Ol erekshe qajettilikteri bar adamdardy jan-jaqty qoldaý – «AMANAT» partıasynyń basymdyqtarynyń biri ekenin atap ótti.

Aqmola oblysy Shortandy kentiniń 8 myńnan astam turǵyny aýyz sý tapshylyǵyn ótkir sezinip otyr. Máseleniń sheshimin izdegen Serikbol Mereı partıa tóraǵasymen kezdesýge keldi.

«Qoldanystaǵy jeti uńǵymanyń tek tórteýi ǵana jumys istep tur, qalǵandarynda sý qory taýsylǵan. Ásirese, jaz mezgilinde egistikterdi sýarýǵa jáne tehnıkalyq qajettilikterge kóp mólsherde paıdalanylǵandyqtan sý tapshylyǵy aıtarlyqtaı seziledi», – dedi ol.

Erlan Qoshanov bul máseleni sheshý úshin qazirgi ýaqytta toptyq sý qubyryn tartý jobasy ázirlengenin aıtty. Jumys kólemi men ony oryndaýshylar belgili boldy. «AMANAT» partıasynyń Májilistegi fraksıasy sý qubyry jelilerin qaıta jóndeýge respýblıkalyq búdjetten jaqyn arada tıisti qarajat bólýdi óz baqylaýyna alady.

Al elorda turǵyny, 11 balanyń anasy Nurgúl Qadyrbaeva eki uly Arman men Anas fýtboldan Qazaqstan men TMD elderinde ótken chempıonattarda joǵary sheberlik kórsetkenin atap ótti. Sóıtip, olar Portýgalıadaǵy Bsports jastar klýbyna óner kórsetýge shaqyrtý alǵan. Biraq qarjylyq jaǵdaıdyń qıyndyǵyna baılanysty bara ala almaı otyr.

«AMANAT» partıasynyń tóraǵasy batyr anaǵa jas fýtbolshylar úshin qajetti kómek kórsetiletinin aıtty. Bul máselege elorda ákimdigi men Mádenıet jáne sport mınıstrligi de atsalysatyn bolady.

Erlan Qoshanov barlyq qaralǵan ótinish boıynsha partıa fılıaldaryna naqty tapsyrmalar berip, olardyń sheshilýin jeke baqylaýyna aldy.