Tótenshe jaǵdaılar mınıstrligi bólimsheleriniń árbir ekinshi basshysy sybaılas jemqorlyqqa jol bergen. Bul týraly búgin Tótenshe jaǵdaılar mınıstrliginiń basshylyǵymen ótken keńes barysynda Sybaılas jemqorlyqqa qarsy qyzmettiń tóraǵasy Asqat Jumaǵalı málim etti. 

Onyń aıtýynsha, sońǵy 5 jylda azamattyq qorǵaý organdarynda 150-ge jýyq sybaılas jemqorlyq faktisi tirkelgen. Jemqorlyq elimizdiń barlyq óńirinde jasalǵan. Olardyń basym bóligi Almaty, Astana, Shymkent qalalarynda, Qostanaı jáne Almaty oblystarynda anyqtalǵan. Ásirese paraqorlyq pen jymqyrý faktileri kósh bastap tur.

Órt qaýipsizdigin qamtamasyz etý boıynsha tekserý aktisine qol qoıý kezinde, oqýdan ótkizý, ruqsat berý jáne jumysqa ornalasý úshin para berilip otyrǵan. Agenttik tóraǵasy sybaılas jemqorlyqqa qarsy júrgizilip jatqan jumystarǵa qaramastan, TJM qyzmetkerleri para alýdan tyıylmaǵanyn atap ótti.

"Kúni keshe Jetisý oblysynda jergilikti TJD bólim basshysynyń jumysqa alǵan adamnan aqsha alǵany anyqtaldy. Ol búgingi is-sharanyń ótetinin bile tura, sonda da qylmysqa baryp otyr. Bul oraıda profılaktıkalyq turǵyda naqty áreket etý qajet. Qyzmetkerlerdiń minez-qulqyn túzetip, psıhologıalyq kózqarasyn ózgertý mańyzdy" – dedi Asqat Jumaǵalı.

Tótenshe jaǵdaılar mınıstri joǵaryda atalǵan faktilerdi moıyndap,vedomstvo sybaılas jemqorlyqqa qarsy kúresti kúsheıtý úshin túbegeıli qadamdar jasaıtynyn málimdedi.

"Bul – bizdiń qyzmetkerler úshin jaǵa ustatarlyq jaǵdaı. Atalǵan adamdar belgili bir jetistikterge qol jetkizgen úzdik qyzmetkerlerdiń qatarynan bolatyn. Degenmen osy jaǵdaıda olardyń biz bilmegen teris qasıeti – ekijúzdiligi áshkerelendi. Aıtylyp ótken derekterge qatań synmen qaraımyz. Budan  tıisti sabaq alamyz, qarapaıym órt sóndirýshiler bizge senimmen qaraýy kerek", – dedi Sháriphanov.

.