Semeıde qańtar oqıǵasy kezinde Jandos Jotabaevty azaptaǵan 2 polısıa qyzmetkeri shartty túrde sottaldy. 

İs boıynsha Semeı soty polıseıler 23 jastaǵy Álisher Qanaqynov pen 27 jastaǵy Ersultan Aǵzamovqa shartty úkim shyǵardy.

Sot Qanaqynov pen Aǵzamovty "ar-namysty qorlaıtyn is-áreket nemese azaptaý" babymen kináli dep tanyp, 4 jylǵa shartty túrde sottady. Úkim shyǵarý kezinde aıyptalýshylardyń jasy esepke alynǵan. 

Sondaı-aq, sot olardy moraldyq ótemaqy retinde 4,5 mıllıon teńge tóleýge mindettedi.

Eske sala keteıik, Jandos Jotabaev byltyr 6 qańtarda "beıbit mıtıńke qatysqany úshin" ustalǵan. Ol polısıa bólimshesinde eki kún qamaýda bolyp, keıin ýaqytsha qamaý ızolátoryna aýystyrylǵan. 17 qańtarda ızolátor qyzmetkerleri jedel járdem shaqyryp, Jotabaevtyń qaıtys bolǵanyn habarlaǵan. Jandos Jotabaevtyń baýyry 2022 jyly aqpanda zertteý kezinde marqumnyń ókpesinen suıyqtyq tabylǵanyn, mundaı jaǵdaı qatty soqqyǵa jyǵylǵan adamda bolatynyn aıtqan. Baýyrynyń aıtýynsha, onyń 11 qabyrǵasy synǵan.