QR Ǵylym jáne joǵary bilim mınıstri Saıasat Nurbek jumys saparymen Abaı oblysyna keldi. Sapar barysynda oblys ákiminiń orynbasary Shalqar Baıbekovpen birge birqatar mańyzdy sharalarǵa qatysty.

Mınıstr sapar barysynda «Semeı medısına ýnıversıteti» KEAQ bazasynda ornalasqan murajaıǵa bardy. Murajaı «Ýnıversıtet tarıhy» jáne «Keńes Odaǵynyń Batyry Mánshúk Mámetova» atty eki ekspozısıadan turady. Birinshi ekspozısıada medısına ýnıversıtetiniń tarıhy men qyzmeti, qurylǵan kúnnen bastap búgingi kúnge deıin atqarylǵan jumystar týraly aqparat berilgen. Ekinshi ekspozısıa Keńes Odaǵynyń batyr qyzy Mánshúk Mámetovaǵa arnalǵan. Onda batyr qyzdyń óz qolymen jazǵan ómirbaıany, maıdan dalasynda jazylǵan hat kóshirmeleri qoıylǵan.

Sapar aıasynda vedomstvo basshysy Qazaqstan Respýblıkasy joǵary oqý oryndary qaýymdastyǵynyń jalpy jınalysynyń otyrysyna qatysty. İs-shara joǵary jáne joǵary bilimnen keıingi bilim berýdi jetildirý, zaman talabyna saı adamı kapıtaldy damytý jáne ýnıversıtetterdiń úshinshi mısıasyn júzege asyrý máselelerin talqylaý maqsatynda uıymdastyryldy. Jıyn barysynda rektorlar joǵary oqý oryndarynyń óńirlerdiń áleýmettik-ekonomıkalyq damýyndaǵy orny men bilim berý baǵdarlamalaryn damytýdaǵy strategıalyq mindetter týraly pikir almasty. Otyrys sońynda Qaýymdastyq elimizdegi akademıalyq bilim berý júıesin damytý, halyqaralyq baılanystardy jetildirý jáne óńirlerdi sapaly kadrlarmen qamtýdyń ózekti máseleleri týraly qarar qabyldady.

«Mınıstrlik bastaǵan jumys birqalypty júrip jatyr. Joǵary oqý oryndarynyń rektorlary anyqtaldy, josparlar belgilendi. Ótken jyly jaqsy nátıjelerge qol jetkizildi. Árbir joba birinen soń biri qaralyp, júzege asyrylyp jatyr», - dedi Saıasat Nurbek.

Sonymen qatar, Shákárim ýnıversıtetinde Halyqaralyq ıadrolyq synaqtarǵa qarsy is-qımyl kúni qarsańynda «Semeı ıadrolyq synaq polıgony: ǵylym jáne sosıým» atty halyqaralyq dóńgelek ústel ótti.

Jıyn barysynda sarapshylar men mamandar, sonyń ishinde Halyqaralyq antıadrolyq qozǵalys ókilderi, ǵalymdar jáne Ulttyq ıadrolyq ortalyq ókilderi baıandama jasady. Olar ıadrolyq synaqtarǵa qatysty ekologıalyq, ǵylymı, tarıhı jáne áleýmettik máselelerdi jáne onyń aımaq pen jahandyq qoǵamǵa áseri jaıyndaǵy zertteýlerimen bólisti.

Shara aıasynda Shákárim Qudaıberdiulynyń eskertkishine gúl qoıý rásimi, sýretshi Qurman Aımuhanbetovtyń «Semeı polıgonynyń qasireti» atty kórmesi uıymdastyryldy.