Áleýmettik jelide qańtar oqıǵasynda qaza tapqan 4 jasar Aıkórkemniń ákesi Aıdos Meldehannyń ótken ómirine qatysty túrli aqparat taralyp jatyr. Búgin advokat Lázzat Ahatova óziniń facebook paraqshasynda Aıdos Meldehanǵa qatysty "qyzynyń ólimin saýdaǵa saldy", "2006 jyly aýyr qylmys jasap 10 jyl túrmede otyrǵan" degen málimetter jarıalady. 

"4 jasar qyzynyń ólimin saýdaǵa salyp júrgen Aıdos Meldehannyń ózi 2006 jyly aýyr qylmys jasap, bireýdiń órimdeı qyzyna zorlyq jasamaq bolyp, ol kónbegen soń, qınap óltirgenin, sol úshin uzaq merzimge sottalǵanyn bireý bilse, bireý bilmeıdi. Al 10 jyldan asa túrmede otyrǵan Aıdos Meldehan kishkentaı qyzynyń ólimi úshin ár túrli uıymdardan qansha qarajat alyp, qansha paıda kórgeni de kópshilikke beımálim" dep jazdy advokat.

Osyǵan balanysty Qamshy.kz aqparat agenttigi Aıdos Meldehanǵa habarlasyp, pikirin bilgen bolatyn. 

"Qazir bılik adamdary túrli aqparat taratyp, qazaq halqyn ádeıi maǵan qarsy qoıyp jatyr. Men – shyndyq izdep júrgen adammyn. Bılikten qyzymnyń ólimine kinálilerdiń jaýapkershilikke tartylǵanyn ǵana talap etemin.  Al burynǵy ómirimniń qańtar oqıǵasyna eshqandaı qatysy joq. Qańtarda qaıtys bolǵan qyzdyń ákesi retinde qyzymnyń quqyǵy úshin kúresem"– dedi Aıdos Meldehan.

Ol ózin "qyzynyń ólimin saýdaǵa aınaldyryp, bılikten 100 mln surady" degen aıyptaýlarǵa da jaýap berdi.

"Bılikten aqsha dámetip júrgen joqpyn. Bunyń barlyǵy – jalǵan aqparat. Bizge páter berilgeni ras. Biraq osyǵan deıin sol páterdiń zańdy túrde maǵan jazylmaǵanyn dáleldep berdim. Kerek bolsa, bergen páterlerin alyp ketsin. Qazir Aıkórkemniń isi boıynsha Juman Arman Igilikuly degen jigitti jaýapkershilikke tartylyp jatyr. Ol – joǵarydan túsken buıryqty oryndaýshy ǵana. Odan joǵary komandırleri bar. Keminde bólimshe komandıri jaýapkershilikke tartylý kerek edi.  Al qarý qoldanǵan adamdar kýáger retinde qaralyp jatyr. Oq atqan adam eshqandaı jaǵdaıda kýáger bola almaıdy. Meniń bar talabym – sol kinálilerdiń jasaǵan qylmysy úshin jaýapkershilikke tartylýy. Bılikten basqa eshteńe suramaımyn. Bular bolsa, halyqty maǵan qarsy qoıýdyń amalyn jasap jatyr" – dep aıtty Aıkórkemniń ákesi.

Sonymen qatar, Aıdos Meldehan Aıkórkemmen bir kólikte bolyp, birneshe jerden jaraqat alǵan ekinshi qyzy Janeldiń jaǵdaıyn da málimdedi. 

"17 jastaǵy qyzym Janeldiń denesinde oq qaldyqtary áli bar. Júreginen 2 mm jerde de oq qaldyǵy tur. Sol oqtardy aldyrtýdyń amalyn jasaýym kerek. Ózimniń de densaýlyǵym máz emes. Dárigerler "bir búırekti alyp tastaý kerek" dep jatyr. Onyń ústine aǵzamdaǵy qant mólsheri de kóterilip ketken. Búgin bar, erteń joq adammyn. Tiri kezimde Janeldiń densaýlyǵy men balalarymynyń quqyǵy úshin kúresip ketýim kerek. Shyndyqtyń aty – shyndyq. Eger kúres jolyna túskenim úshin balalaryma qater tónetin bolsa, syrt memleketterden, halyqaralyq adam quqyǵyn qorǵaıtyn uıymdardan kómek suraıtyn bolam"– deıdi Aıdos Meldehan.