Jambyl oblysyndaǵy áskerı qoımany qasaqana órtedi dep aıyptalyp jatqan eki sarbaz 13 jylǵa bas bostandyǵynan aıyrylýy múmkin, dep habarlaıdy KTK.
2021 jyly Baızaq aýdanynda bolǵan jarylysqa qatysty kóshpeli sotta prokýrorlar jaýyngerlerge osyndaı jaza kesýdi surady.
Memlekettik aıyptaýshy eki kúdikti matany órtep, oq-dáriler turǵan qoımaǵa terezeden ádeıi laqtyrǵan deıdi. Al sarbazdardyń bul iske barýyna shtab bastyǵymen jeke bas arazdaǵy sebep kórinedi.
"QR QK 202-baby, 3-bóliginiń 1,2-tarmaqtary boıynsha 10 jylǵa bas bostandyǵynan aıyrýdy, QK 459-babynyń 2-bóligi boıynsha 5 jylǵa bas bostandyǵynan aıyrý jazasyn taǵaıyndaýdy, QR QK 58-babynyń 3-bóligin negizge ala otyryp, jazany ishinara qosý arqyly túpkilikti 13 jyl merzimge bas bostandyǵynan aıyrýdy taǵaıyndaýdy suraımyz", - deıdi Ońtústik aýmaǵy áskerı prokýrordyń orynbasary Asylbek Temirbekov.
Osy iske qatysty taǵy tórt ofıser aıypty dep tanylǵan. Olar salǵyrttyq jáne qarý-jaraqty saqtaýda qaýipsizdik erejelerin eskermeý babymen jaýap berýde. Prokýrorlar jarylys bolǵan bólim komandıri men onyń orynbasaryn 6 jylǵa sottaýdy surady. Qalǵan eki qyzmetkerdi qylmystyq jaýapkershilikke tartý merziminiń ótip ketýine baılanysty jazadan bostýdy usyndy.
Al jarylysty "qoldan uıymdastrdy" dep taǵylǵan aıyp emes, qos jaýyngerlerge jabylǵan jala deıdi olardyń ata-analary. Sózderinshe, dál sol ýaqytta sarbazdar oqıǵa ornynda múlde bolmaǵan.
"Biraq meniń balam o bastan ondaı bolmaǵan dep moıyndap otyr. Ol ýaqytta Turanov ekeýi shóp tazalaǵan. Eki balaǵa qosylyp ketken. 14-shi qoımany tipti bilmegen olar. Bilmeıdi de. Bular bizdiń balalarymyzdy kinásiz kinálap otyr ǵoı. Biz soǵan kelispeımiz. Shyndyq kerek bizge. Sotymyz ádil bolsa eken dep talap etemiz", - deıdi sarbazdyń anasy Almagúl Asanova.
Eki jyl buryn bolǵan joıqyn jarylystan 17 adam qaza taýyp, 100-ge jýyq jan jaralandy. Keltirilgen shyǵyn kólemi 25 mlrd teńgeden asady.
Pikir qaldyrý