Túrkıada jol apatyna túsken taǵy bir qazaqstandyq kóz jumdy, dep habarlaıdy KTK arnasyna silteme jasap. Nurbolat Qurmashov jansaqtaý bólimine túsken edi. Keshe ol esinen jımastan qaıtys boldy.
Alanıadaǵy jol apatynda Qazaqstannan demalýǵa barǵan bir otbasynyń eki múshesi oqıǵa ornynda qaıtys bolǵan. Atyraýlyq jýrnalıs Araılym Baqytjan men onyń eki jastaǵy qyzy dárigerler kelgenshe kóz jumdy. Al onyń kúıeýi Nurbolat Qurmashov jansaqtaý bólimine túsken. Keshe ol esinen jımastan qaıtys boldy. Olardyń 9 jasar uly aman qaldy.
Búgin marqumdardyń súıegi elge jetkiziledi.
Aıta keteri, buǵan deıin syrtqy ister mınıstrligi jol apatynyń mán-jaıyn jarıalaǵan. Sol kúni safarı-djıpte 15 adam bolǵan. Oǵan eki balasymen birge qazaqstandyq erli-zaıypty da mingen. Olar 30 tamyz kúni Alanıaǵa demalýǵa barǵan. 4 qyrkúıekte elge qaıtýdy josparlaǵan. Safarı-djıp qatar kele jatqan kólikpen soqtyǵysqan. Bári kólikten ushyp túsken. Al polısıa adamdardyń qaýipsizdik beldigin taqpaǵanyn aıtyp otyr. Biraq mınıstrlik ókilderi 15 adamnyń shaǵyn safarı jıpke qalaı syıǵanyn túsinbeı otyr.
Buǵan deıin Alanıada demalyp qaıtqan Sputnik Qazaqstannyń oqyrmany safarı-djıpte eshqandaı qaýipsizdik beldigin kórmegenin aıtty.
"Óz basym qaýipsizdik beldigin kórgen emespin. 10-15 adamdy jıptiń artyna otyrǵyzyp qoıady da, bir-birimen jarysady. Tóbesi ashyq, eshkim otyrmaıdy, túregep turady. Jolda bir-birine sý shashady. Kólik júrgizýshisi qaýipsizdikti saqtaý qajettigin aıtpaıdy da, olar oıyn-saýyqtyń kóp bolǵanyn qalaıdy ǵoı. Internette vıdeolary kóp", - deıdi Astana turǵyny.
Pikir qaldyrý