Qala ákimi úzdiksiz jylýmen jabdyqtaý úshin Iýjnaıa qazandyǵyn rekonstrýksıalaýdy aıaqtaýdy tapsyrdy

Almaty ákimi Erbolat Dosaev jumys sapary aıasynda Bostandyq aýdanyndaǵy Iýjnaıa qazandyǵynyń rekonstrýksıalaý nysanymen tanysty, sonymen qatar, Bostandyq aýdanynyń turǵyndaryn elektr qýatymen qamtamasyz etetin «Almagúl» qosalqy stansıasyna bardy.  Basty maqsat – ınjenerlik ınfraqurylym nysandarynyń aldaǵy jylytý maýsymyna daıyndyǵyn tekserý, dep habarlaıdy almaty-akshamy.kz

Alǵashqy nysanda megapolıs basshysy Almaty qalasyndaǵy Iýjnaıa aýdandyq qazandyǵynyń qaıta jańartý barysyn tekserdi. Joba aıasynda 3 eski sý jylytatyn qazandyq jańalanyp, 1 qazandyq kúrdeli jóndeýden ótedi.

Qalalyq energetıka jáne sýmen jabdyqtaý basqarmasynyń basshysy Talǵat Malybaev ákimge qazir barlyq tehnologıalyq jumys aıaqtalǵanyn, gaz qubyrlaryn, tútin murjalaryn oqshaýlaýdy, mazýt saqtaý rezervýarlaryn qorshaýdy, montajdaýdy, sonymen birge irgeles aýmaqty abattandyrýdyń, iske qosý-retteý jumystarynyń jalǵasyp jatqanyn aıtty.

Erbolat Dosaev Energetıka jáne sýmen jabdyqtaý basqarmasy basshylyǵynyń nazaryn merdiger uıymnyń jumystardy aıaqtaýdyń buryn buzylǵan merzimine aýdaryp, bıyl 1 qazannan keshiktirmeı nysannyń 100% daıyn bolýyn qamtamasyz etýdi tapsyrdy.

Anyqtama: buǵan deıin jobanyń ýaqytyly aıaqtalýyna jol bermeý úshin ákimdik «Sılýmın-Vostok» JSHS jetkizýshisi usynǵan 5 sáıkes kelmeıtin jelilik sorǵyny aýystyrý jóninde jedel sharalar qabyldaǵan bolatyn, sebebi jelilik sorǵylardyń elektr qozǵaltqyshtarynyń tez qyzyp ketýine baılanysty túıtkilder týyndady. Máselen, 2022 jyly ákimdik qazandyqty rekonstrýksıalaý jónindegi jumys jobasy aıasynda ornatylǵan bes jelilik sý sorǵysy úshin tólengen somany qaıtarý úshin Almaty qalasynyń MAES-ne talap aryz berdi. Osyǵan baılanysty, merdiger uıymnan tólengen jelilik sorǵylar úshin jergilikti búdjettiń kirisine joǵaryda kórsetilgen somany óndirip alý úshin sot prosesi júrgizildi. Búginde bul is Energetıka jáne sýmen jabdyqtaý basqarmasynyń paıdasyna sheshildi, sot sheshimi kútilip otyr.

«Bostandyq aýdanynda qazandyqty rekonstrýksıalaý jobasy aıaqtalyp keledi: qýaty 55 Gkal-saǵatqa artty, 190 Gkal-saǵatqa jetti. Bul qalanyń ońtústik bóligin, 200 myń tutynýshyny, sonyń ishinde ál-Farabı dańǵylynan tómen Gagarın, Rozybakıev, Jarokov kóshelerindegi jańa turǵyn úı keshenderin úzdiksiz jylýmen jáne ystyq sýmen qamtamasyz etýge múmkindik beredi», - dedi Erbolat Dosaev merdiger uıymǵa kelesi aptadaǵy aralyq qorytyndy týraly baıandaýdy tapsyrdy.

Qala ákimi qurylys-montaj jumystaryn oryndaý sapasyna qatysty birqatar tapsyrma berdi. Erbolat Dosaev bul is turaqty túrde baqylanyp turý kerektigin aıtty.

Almaty ákiminiń kelesi aıaldaǵan nysany bıyl 1 tamyzda paıdalanýǵa berilgen «Almagúl» jańa podstansıasy boldy. Jańa nysan 100 mVt qýatqa arttyi. Podstansıanyń basty mindeti – qazirgi jáne jańadan salynyp jatqan turǵyn úı keshenderin qosqanda 200 myńnan astam tutynýshyny qamtý. Qazirgi tańda komýnaldyq qyzmetter Almagúl shaǵyn aýdany, ál-Farabı - Jarokov - Ótepov - Rozybakıev kósheleriniń kvadratyndaǵy osy podstansıaǵa turǵyn úı keshenderin qosý boıynsha jumystardy aıaqtady.

Jańa podstansıadan taratý pýnktterine qýat berý úshin uzyndyǵy 10,2 shaqyrym 10 kV kabeldik jelilerdiń trassasy salynǵanyn atap ótken jón, sonymen birge osy qosalqy stansıaǵa 110 kV elektrmen jabdyqtaýdyń 4,8 shaqyrym kabeldik jelisin tóseý aıaqtaldy.

Qazir «AJK» seksıalarda kabelderdi qosý jáne tutynýshylardyń júktemesin bólý jónindegi is-sharalardy qolǵa alǵan. Jumys kestege sáıkes júrgiziledi.

Injenerlik ınfraqurylym nysandaryn aralaý qorytyndysy boıynsha Almaty ákimi qalanyń aldaǵy jylytý maýsymyna daıyndyǵy máselesi erekshe baqylaýda ekenin atady. Komýnaldyq kásiporyndardyń ókilderi barlyq jumysty bekitilgen kestege sáıkes aıaqtaýǵa tıis.