Qala ákimdigi jospardan tys tekserýler barysynda buzýshylyqtar anyqtaldy.

Óńirlik komýnıkasıalar qyzmetiniń brıfıńinde zańsyz qurylys salýǵa qatysty qabyldanyp jatqan sharalar týraly Almaty qalasy qala qurylysyn baqylaý basqarmasy basshysynyń orynbasary Oljas Tólebaev aıtyp berdi, dep habarlaıdy Almaty-akshamy.kz. 

Spıkerdiń málimetinshe,  qala aýmaǵynda 823 obektiniń (búdjettik 240, komersıalyq 583), onyń ishinde 155 turǵyn úı kesheniniń qurylysy júrgizilýde. Qurylys obektilerinde 383 qurylys kompanıasy, 138 tehnıkalyq qadaǵalaý uıymy jumyldyrylǵan.

“Baqylaý fýnksıalary sheńberinde 2023 jyly 740 jospardan tys tekserý júrgizildi, jalpy somasy 187 mln teńgege ákimshilik aıyppul salynǵan 956 buzýshylyq anyqtaldy”, - dep habarlady ol.

Buzýshylyqtardy joıýǵa 779 nusqama berildi. Sapasyz qurylys jáne qurylys-montajdaý jumystaryn júrgizgeni úshin 312-bap boıynsha 35,7 mln. teńge somasyna 47 merdiger uıym jaýapkershilikke tartyldy, onyń ishinde:

- búdjettik obektiler boıynsha 9 mln. teńge somasyna 14 merdiger uıym;
- komersıalyq obektiler boıynsha 27,6 mln. teńge somasyna 33 merdiger uıym.

Aǵymdaǵy jyldyń basynan bastap sottarǵa zańsyz salynǵan obektilerdi buzý týraly 53 talap-aryz joldandy (17 qanaǵattandyryldy, 36 qaraýda). Zańsyz salynǵan 19 obekt buzyldy (onyń ishinde 2022 jylǵy sheshimder boıynsha). Lısenzıadan keıingi baqylaý qorytyndysy boıynsha 20 qurylys lısenzıasynyń qyzmeti ýaqytsha toqtatyldy, 247 lısenzıasynyń kúshi joıyldy.

2022 jyldan bastap Basqarma Almaty qalasynyń taýly aımaqtarynda zańsyz qurylystyń 52 faktisin anyqtady, onyń ishinde:

- Bostandyq aýdany 21 nysan;
- Medeý aýdany 24 nysan;
- Naýryzbaı aýdany 7 nysan.

Anyqtalǵan 52 obektiniń ishinen:

- sotqa 42 talap aryz berildi (16-dan sot sheshimi bar. Onyń ishinde: buzýǵa – 10, nusqamany oryndaýǵa - 6);
- sotqa 7 talap - aryz daıyndalýda-;
- 3-ýi boıynsha tekserý sharalary júrgizilýde.

«Búgingi tańda sáýlet-qurylys baqylaý organdary ınspeksıalaý sheńberinde obektige kedergisiz kirý quqyǵynan aıyrylǵany jáne tekserýler QR Kásipkerlik kodeksine sáıkes resmı ótinishter negizinde ǵana júrgiziletini belgili. Almaty qalasy ákiminiń bastamasy boıynsha Prezıdenttiń qoldaýymen tekserý júrgizý tártibin qaıta qaraý jáne salynyp jatqan obektilerge baqylaýdy kúsheıtý jóninde túzetýler engiziledi. Tıisti zań jobasy Parlamenttiń qaraýyna jiberildi», - dep atap ótti ol. 

Sondaı-aq, spıker jyljymaıtyn múlik satyp alýdy josparlap otyrǵan Almaty turǵyndaryna júgindi. Jyljymaıtyn múlikti satyp almas buryn salynyp jatqan TÚK-niń qujattarynyń tolyq paketin qala qurylysyn baqylaý basqarmasynyń jedel jelisiniń +7 705 89 66 000 WhatsApp nómiri boıynsha tekserý qajet.