Qazaqstan musylmandar dinı basqarmasy Palestınadaǵy qaqtyǵysqa baılanysty málimdeme jasady. 

– Islam dinindegi qasıetti úshinshi meken sanalatyn Qudys jerinde bolyp jatqan qantógiske qatty alańdaýshylyq bildiredi jáne qanshama jyldan beri sheshimin tappaı kele jatqan máseleniń beıbit jolmen, ózara ymyra aıasynda sheshilýin tileıdi.

Adamzat balasyn birlik pen ıgilikke shaqyrǵan paıǵambarlar izi qalǵan qasıetti mekenniń búginde soǵys alańyna aınalyp, myńdaǵan beıkúná jandardyń, ásirese sábıler men beıbit turǵyndardyń oqqa ushyp, qaza tabýy barshamyzdyń janymyzǵa qatty batýda. Aýyr jaraqat alyp, úreı qushaǵynda ómir súrip otyrǵan jandardyń tez saýyǵyp ketýin tileımiz, – delingen málimdemede.

Sondaı-aq múftıat taraptardy beıbit kelisimge kelýge jáne qantógisti shuǵyl toqtatyp, halyqqa zarar keltirmeýge úndedi.

– Sondaı-aq, Palestına halqynyń halyqaralyq kelisimder men rezolúsıada bekitilgen tarıhı quqyǵyn qoldaıtyndyǵymyzdy málimdeımiz.

Elimizdegi barsha musylman qaýymyn qasıetti mekenniń tynyshtyǵy men amandyǵy úshin duǵa jasaýǵa shaqyramyz. Alla Taǵala jer betin túrli búlikter men soǵystan aman etkeı. Ámın!, –  dep málimdedi QMDB.