Búgin Májilistiń jalpy otyrysynda 2024-2026 jyldarǵa arnalǵan respýblıkalyq búdjetti bekitti. Palata tóraǵasy Erlan Qoshanov zańnyń mańyzdylyǵyna toqtalyp, aýqymdy jumys atqarylǵanyn atap ótti.

– Memleket basshysy Qasym-Jomart Kemeluly Toqaev bıylǵy joldaýynda jańa ekonomıkalyq saıasat jarıalady. Onyń túpki muraty – halyqtyń ál-aýqatyn arttyrý. Osy oraıda respýblıkalyq búdjet, birinshi kezekte, Prezıdent júktegen mindetterdi iske asyrýǵa baǵyttalyp otyr. Eń bastysy bul qujat áleýmettik mindettemelerdi tolyq oryndaýǵa, eldiń turmysyn jaqsartýǵa múmkindik beredi, – dedi E.Qoshanov.

Depýtattar búdjetti eki aı boıy jumys toptarynda jan-jaqty talqylandy. Májilistegi barlyq fraksıa otyrystaryn ótkizip, óz ustanymdaryn anyqtady. Talqylaý barysynda kóptegen synı pikirler boldy, usynystar aıtyldy. Erlan Qoshanov olardyń barlyǵy búdjette eskerilgenin atap ótti.

– Saılaýshylarymyzdy tolǵandyratyn eń ózekti másele – ınflásıa men azyq-túlik baǵasy. Jylý, jaryq, jol, sýmen qamtamasyz etý de – túıtkildi máseleler. Memlekettik boryshtyń ósýi de depýtattardy alańdatyp otyr. Úkimet bul jaıttarǵa erekshe kóńil bólip, júıeli túrde aınalysýy qajet.

Búdjetti talqylaý kezinde saılaýshylarymyzdyń osy jáne ózge de talap-tilekteri eskerildi, – dedi Palata spıkeri.

Erlan Qoshanovtyń aıtýynsha, birqatar jaıttardy sheshý úshin depýtattar tarapynan qosymsha qarjy qarastyrylǵan. Bir ǵana mysal, 2,5 trln teńge baǵdarlamalardyń, jobalardyń mańyzdylyǵyna qaraı qaıta úılestirildi.

Sonymen qatar Májilis tóraǵasy Úkimetke Ulttyq qordyń qarajatyna ıek arta bermeı, basqa da kiris kózderin qarastyrǵan jón ekenine nazar aýdardy.

– Ózderińiz bilesizder, Prezıdenttiń tapsyrmasymen «Ulttyq qor – balalarǵa» jobasy iske asyryla bastady. Sondyqtan Ulttyq qordaǵy qarjy kólemi qoǵamnyń basty nazarynda ekenin umytpańyzdar. Endigi mindet – Respýblıkalyq búdjetti tıimdi iske asyrý. Depýtattar bekitilgen búdjettiń oryndalýyna júıeli túrde baqylaý júrgizetin bolady. Memleket basshysy bizge dál osyndaı jaýapty mindet júktep otyr. Eń bastysy, búdjettiń ár teńgesi óz maqsatyna jetýi qajet, – dedi E.Qoshanov.