Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty QR ÁQBtK 456-2 babynyń 3 bóligi, «Kórineý jalǵan aqparat taratý» boıynsha azamat Medelhanulyna qatysty ákimshilik isti qarady, dep habarlaıdy zakon.kz.

Sottyń málimetinshe, 2023 jyly 8 qarashada M-nyń «Facebook» -te beınehabarlama jarıalaǵany belgili. Atalǵan jazbada M. 2023 jyly 21 qazanda kórshisiniń ózine shabýyl jasaǵanyn, al bul rette polısıa qyzmetkerleri áreketsizdik tanytqanyn málimdeıdi.

Sondaı-aq polısıa organdary onyń ótinishin qabyldamaǵan jáne qandaı da bir sıpatta áreket etýge tyryspaǵany da aıtylady.

"Sot M. tarapynan polısıaǵa qandaı da bir ótinish jáne málimdeme jasamaǵanyn anyqtady. Sonymen qatar, M. ýchaskelik polısıa qyzmetkerimen áńgime barysynda shaǵymdardan bas tartyp, janjaldyń beıbit jolmen sheshilgenin aıtqan. Osylaısha, M. jelide jalǵan aqparat jarıalaǵan. M. óz kinásin moıyndamady. Sot qaýlysymen M. ÁQBtK-niń 456-2 babynyń 3 bóligi boıynsha ákimshilik quqyq buzýshylyq jasaǵany úshin kináli dep tanylyp, oǵan 69 000 teńge mólsherinde balamasyz ákimshilik aıyppul salyndy", - delingen sot habarlamasynda.

Sot qaýlysy zańdy kúshine engen joq.