Oblys ákimi Nurlan Uranhaev bastaǵan Abaı oblysynyń delegasıasy QHR Shyńjań-Uıǵyr avtonomıaly aýdanynyń iri ónerkásip ortalyǵy – Úrimji qalasyna keldi. Sapar barysynda kásipkerler, bıznes ókilderi men basqarma basshylary óńirler arasyndaǵy uzaq merzimdi yntymaqtastyqty jáne ınvestısıalyq jobalardy júzege asyrý máselelerin talqylady.

«Qytaı – bizdiń aımaqtyń negizgi saýda-ekonomıkalyq seriktesi. Bıyl qańtar-qazan aılarynda Abaı oblysynyń jalpy taýar aınalymynyń 92% nemese 266 mıllıon AQSH dollary Qytaı óńirlerimen shekaralyq saýda arqyly qamtamasyz etilgen. Máselen, eksport 178 mıllıon AQSH dollaryn, Qytaı ónimderiniń ımporty shamamen 88 mıllıon AQSH dollardy qurady», — dedi Nurlan Uranhaev.

Sapar aıasynda oblystan arnaıy barǵan delegasıa «San Bao» Shyńjań saýda-ónerkásiptik korporasıasy» JSHS-niń basshylyǵymen kezdesti. Bul korporasıa Qytaı eliniń eń iri eksporttyq-ımporttyq saýda, shetelde qurylys jobalary arqyly kelisimshart jasaý, óndiris pen óńdeý, qoıma jáne logıstıka, týrısik saýda qyzmetterin usynatyn saýda kesheni.

Shyńjań jáne Qazaqstan eliniń kásipkerleri arasynda iskerlik kezdesý ótip, onda QHR Shyńjań-Uıǵyr avtonomıaly aýdanynyń iri kompanıalary jáne Abaı oblysynan arnaıy kelgen kásipkerler, bıznes ókilderi arasynda yntymaqtastyq týraly birqatar kelisimderge qol qoıyldy.

Budan bólek, Abaı oblysynyń ákimi QKP OK Saıası búrosynyń múshesi, QHR Shyńjań-Uıǵyr avtonomıalyq aýdany QKP partıa komıtetiniń hatshysy Ma Sınjýımen kezdesti. Kezdesý barysynda óńirler arasyndaǵy saýda-ekonomıkalyq yntymaqtastyqtyń damýy jan-jaqty saraptaldy.

Basty nazar óńiraralyq yntymaqtastyq máselesine aýdaryldy. Búginde Qazaqstan Shyńjańmen ónerkásip, kólik, logıstıka, aýyl sharýashylyǵy jáne týrızm salasynda úlken tabysqa jetip otyr. Eki aımaqtyń turaqty damýyna yqpal etetin bul yntymaqtastyqty nyǵaıtý men keńeıtýdiń qosymsha múmkindigine basa nazar aýdaryldy.

Óz kezeginde QHR Shyńjań-Uıǵyr avtonomıalyq aýdany QKP partıa komıtetiniń hatshysy Ma Sınjýı Qazaqstan men Qytaı arasyndaǵy tyǵyz ekonomıkalyq qarym-qatynastyń strategıalyq mańyzyna toqtaldy. Ol Shyńjań-Uıǵyr avtonomıaly aýdany týrızmdi damytýǵa, «Tachen-Semeı» tikeleı áýereısin ashýǵa, sonymen qatar «Bahty» beketinde júk-kólik aǵynyn arttyryp qana qoımaı, sonymen qatar týrıserdiń de qataryna arttyrý úshin beketti jańǵyrtý jumystaryn jedeldetýdiń mańyzdylyǵyna toqtaldy.

Sonymen qatar, Ma Sınjýı Shyńjań-Uıǵyr avtonomıaly aýdanynyń Abaı oblysymen aýyl sharýashylyǵy, geologıalyq zertteý, taýken-óndirisi, energetıka jáne bilim berý sıaqty strategıalyq mańyzdy salada yntymaqtastyqty tereńdetýge daıyn ekenin aıtty. Kórshi óńir Abaı óńirinen et, astyq, júgeri jáne kúnbaǵys maıyn alýǵa nıet bildirdi, sondaı-aq, jel elektr stansıasyn salý jáne stýdenttermen almasý múmkindikterin talqylaýǵa daıyn. Osy oraıda, jaqyn arada Abaı oblysyna arnaıy QHR Shyńjań-Uıǵyr avtonomıaly aýdanynan arnaıy delegasıa jiberý josparlanǵan.