Búgin Májiliste ótip jatqan úkimet saǵatynda depýtat Snejanna Imasheva esirtki saýdasyna qatysy bar polısıa qyzmetkerleri týraly sóz qozǵady. Onyń aıtýynsha, bıyl esirtki zattaryn satqany jáne saqtaǵany úshin quqyq qorǵaý organdarynyń 11 qyzmetkeri men áskerı qyzmetshileri ustalǵan. 

"Polısıa qyzmetkerleriniń ózderi esirtkiniń zańsyz aınalymyna qatysy bar ekendigi bizdi alańdatyp otyr. Nashaqorlyqpen kúresýshilerdiń ózderi oǵan kómektesetini eshkimge qupıa emes. Mundaı faktilerge úzildi-kesildi jol berilmeý kerek jáne sybaılas jemqorlyq jaǵdaıy sıaqty, mundaı shıbórilerdiń basshylary da jaýapqa tartylýy nemese qyzmetinen bosatylýy qajet.", dedi Imasheva.

Depýtat ustalǵan azamattardyń arasynda kóshi-qon polısıasynyń qyzmetkerleri, polısıa departamenti esirtkige qarsy basqarmalarynyń basshylary men jedel ýákilderi, uıymdasqan qylmysqa qarsy basqarmasynyń, túzeý mekemesiniń, Tótenshe jaǵdaılar mınıstrliginiń qyzmetkerleri bar ekenin atap ótti. 

Imashevanyń málimetinshe, bıyl Qazaqstanda esirtkini medısınalyq maqsattan tys paıdalanýdyń 370 myńǵa jýyq faktisi anyqtalǵan.