Almatydaǵy kıim satatyn dúkenniń birinde jeńildik jarıalanyp, onyń arty masqara jaǵdaıǵa ákelipti. Túk kórmegendeı kelgen halyq taǵy da birin-biri taptap, dúkendi qıratqan.

Bul ne? Ashkózdik pe, álde kedeılik sındromy ma?

Psıholog Serikgúl Sálı muny dúnıeqorlyq pen ashkózdik deıdi:

– Árqaısymyzda bul "qasıet" bar. Dúnıeqorlyǵyn basa alatyndar adamdyq deńgeıdiń shyńyna shyǵady, rýhanı, mádenı ósedi. Adam dúnıeqorlyǵyn basqanda kóp aqsha taba bastaıdy. Dúnıeqorlyq degen tek ózińniń qamyńdy oılaý, qanaǵat degen ózińdi toqtatyp, ózgelermen de bólise bilý qasıeti. Tek «maǵan, maǵan» dep bardyń bárin ózine jınaý, qara basyn oılaý dúnıege tym qumar bolýdan shyǵady. Jańaǵy aksıa, jeńildik degenge qushtar bolatyn adamdar kóbine sarań keledi. Bizdiń qoǵamda jomarttyq joǵalyp barady. Ashkóz qoǵam bolyp baramyz, qurdym jaǵynda turmyz, – deıdi ol. 

– Adamzat kedeılikti romantıka qylyp jibergen. Kez-kelgen kınoǵa qarasańyz, kedeıdi jaqsy, baılardy jaman adam qylyp kórsetedi. Menińshe, bul adamdar kóp aqsha tabýǵa umtyla bermesin degen álemdik ıdeologıa. Adamdardyń bári qatty baıyp ketse, kez-kelgen bılik olardy basqara almaı qalady. Sodan bolar, adamnyń bári kúrektep aqsha tappaıdy, tapqanynyń bárin jumsap jiberýiniń barlyq joldary jasalǵan. Baılar tym kóbeıip ketse, ekonomıkada aqsha aınalmaı qalady. Mysaly, meniń 5 mlrd dollar kapıtalym bolsa, men onyń bárin qurtpaımyn, ol jınalyp turady. Sodan ashkózdik paıda bolyp, jınaı túskim keler edi. Tipti brend degenniń ózi baılardyń qaltasyndaǵy aqshany alý úshin oılap tabylǵan. Sonyń arqasynda qarapaıym fýtbolkany 2 myń teńgege emes, 200 myń teńgege alamyz da, jumsalǵan aqsha aınalymǵa kiredi, deıdi bıznesmen Baqytbaı Sabyrbek.