Eks-mınıstr Bıshimbaevtyń isine qatysty tergeý jumystary aıaqtaldy. Bul týraly advokat Janna Muhamadı habarlady. 

"Apta sońynda Saltanat Núkenovanyń ólimine qatysty tergeý aıaqtalǵany týraly habarlama keldi. Qazir bizdi qylmystyq iske qatysty júrgizilgen saraptamalyq materıaldarmen tanystyrdy. Alaıda istiń materıaldaryn áli tolyq kórgenimiz joq. Mundaı isterge qatysty meniń úlken tájirıbem bar dep aıta alamyn. Buǵan deıin adam ólimine baılanysty qylmystyq isterge advokat retinde qatystym. Alaıda saraptama nátıjelerin kórip shoshydym. Mundaı qatygezdikti, salqynqandylyqty alǵash kórýim. Saltanattyń týystaryna degen qurmetpen istiń búge-shegesine deıin aıta almaımyz. Taraptar is materıaldarymen tanysyp, qorǵaý ótinishterin málimdegennen keıin sheshim qabyldaý úshin prokýratýraǵa jiberiletin bolady", dep jazdy advokat. 

Janna Muhamadıdiń aıtýynsha, asa aýyr qylmys jasaǵany týraly habarlamaǵany úshin alty myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna tartylýǵa, alty jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrý jazasy qoldanylmaq.