Búgingi el aýzyndaǵy áńgimeniń biri - Dımash Qudaıbergenniń Astanadan ashqan meıramhanasy. Jarnama dep qalmańyzdar. Áste de olaı emes. Úlgi etý desek, jańylyspassyz..

Esterińizde bolar, byltyr qysta Almatyda bolǵan oqıǵa: qazaqsha as mázirin suraǵan eki qyzdy dámhana qojaıyny «fashıs», «nasıst» dep kúsálap, onymen qoımaı, arnaıy kúzet shaqyrtyp tamaqtaný ornynan jelkelep qýyp shyqqany...

Sol kezde búkil qoǵam jaǵasyn ustap, dúr etti. Shynymen de arty jaman bolyp kete jazdady. Aqyry álgi qyzmet kórsetý ornynyń qojaıyny - ózge etnos ókili dúıim jurt aldyna shyǵyp, keshirim surap, áýpirimdep áreń degende basyn daýdan arashalap qalǵan. Bir jyl buryn dámhana saıtynda jarıalanǵan keshirim suraý vıdeosy búginderi joıylǵan. «Súıekke tańba» vıdeony saqtap, qaıtsiń deısiń ǵoı?.. Aqyrynda «zákún soqqysh» hanym ıt bolyp, as mázirin qazaqshalaǵan da...

Kóp uzamaı taǵy osy Almatyda «Pınta meıramhanalar» jelisinde shý shyqty. Qazaqsha án qoıýdan bas tartqan bul qyzmet kórsetý oryny da qazaq tiline pysqyryp qaramaıtyny áshkere boldy. Mundaı bassyzdyqqa kýá qoǵam talaǵy tars aıyrylyp, bıznes nysanyna baıkot jarıalady. «Qysylǵannan qyz boldymnyń» kerin keltirip, apyl-ǵupyl bárin qazaqshalap, oryndalatyn ánderine qazaqsha ánderdi de qosyp, «Biz QR zańdaryn saqtaımyz» dep bular da artynan rásmı málimdeme jasaı saldy. Ejelden solaı bolyp kele jatqan qusatyp. Bul oqıǵa osylaı tyna qalǵan edi.

Qaraly qańtardan keıingi Mýhorápovpen bolǵan daýdy eske salyp jatýdyń da qajeti bolmas.

Qalaı degenmen de táýelsizdik alǵanyna 30 jyldan assa da Qazaqstanda qazaq tilinde qyzmet kórsetýdi surap, ony sizge kórsete qoımasa, oǵan tań qalmaı-aq qoıýyńyzǵa bolady. Óıtkeni memlekettik tilge, memleketti quraýshy bas ultqa degen qurmet, ókinishke qaraı, kóp jerde áli de tómen. Ásirese, qyzmet kórsetý salasynda...

Endi Dımashtyń ulttyq reńke ıe meıramhanasy týraly sózge qaıta oralalyq. Ony sýrettesek, sózimiz búginmen bitpes. Qysqa qaıyrsaq, esikten kirip, tańdaǵan ústelińizge jetpesten, aldymen kózińiz, kóńilińiz, sodan soń ishki jan dúnıeńiz toıyp úlgeredi: bastysy - qazaqqa degen naǵyz qurmetti ón-boıyńyzben shyndap sezinesiz. Áý degende, sálem berip, esik aldynan qarsy alatyn daıashy ul-qyzdardyń ústinen ulttyq kıimdi kóresiz. Ár ıntererdiń qymbatqa jasalǵany bilinip tursa da odan qazaqy qarapaıymdylyq lebin birden sezinesiz. Artyq-tyrtyq, daraqylyq múlde baıqalmaıdy. As máziri, árıne qazaq tilinde; ulttyq taǵamdarǵa barynsha basymdyq berilgen. Ár taǵamnyń qazaqı óz ataýy bar. Órme tós, Ertoqym, Samaltaý... Olardyń mán-maǵynasyn asty aldyńyzǵa ákelgen daıashy qyz-jigitter asyqpaı, qysqa-nusqa baıandap beredi. Odan bólek, munda áýelegen qazaqtyń qońyr áýenine elitip qana qoımaı, ózindik syry men tarıhy bar ulttyq mýzyka aspaptaryn da tamashalaı alasyz. Bir sózben aıtqanda, kez kelgen qonaqty, ásirese sheteldikterdi qazaqty tanytý úshin uıalmaı aparýǵa bolatyn oryn...

Álemdik brendke aınalǵan otandasymyz meıramhana ataýyna óz atyn paıdalansa da bolar edi. Joq. Mańdaıshada «Daıdıdaý» degen jazý tur. Ol osylaısha ózin emes, óz ultynyń tarıhyn ulyqtaýdy jón dep taýypty. Bireý biler, bireý bilmes: bertinge deıin halyq áni dep atalyp kelgen «Daıdıdaý» Maǵjan Jumabaevtyń qarańǵy qapasta otyryp jan jaryna jazǵan haty bolyp tabylady. Ánniń osyndaı ult zıalylaryna qyrǵıdaı tıgen zulmatty jyldardy eske salatyn tarıhı syry bar. Osy jaǵynan alǵanda, Dımash talantymen, ánimen ǵana emes, ón boıyndaǵy qazaqylyǵymen de ultqa úlgi...

Aıtqandaı, naqtysynda, Dımashtyń qaryndasy Raýshanǵa tıesili bul nysan. Biraq, jurt «Dımashtiki» deıdi ony júregindegi jaqsysyna jaqyndap. Onyń ústine Dımash ár suqbatynda óz jetistigin ózine ǵana emes, bútin otbasysyna tıesili ekenin únemi aıtyp otyrady. Iaǵnı, áke-sheshesine, ata-apasyna, ini-qaryndasyna degendeı. Ol kisilerdiń kim ekenin aıtyp jatýdyń ózi artyqtaý bolar.

Bul arada aıtaıyn degenimiz, ult janashyry bolyp tabylatyn Qudaıbergender otbasy bıznes júrgizýde de barshaǵa úlgi. Iaǵnı, kásip júrgizýde qazaq tilin, qazaqty syılaý qalaı bolatynyna basy jetpeı jatqandar bolsa, osy kisilerdiń jasap júrgenine bir qarap qoısa bolady...