Memleket basshylyǵyna sózi túzý, taıǵanaq emes, jaltaq-jaǵympaz emes, tabandy, el taǵdyryn oılaıtyn azamattardy áli ańsap kelemiz. Ondaı jandar áli de birli jarym. Qazaq úshin qastandyqtyń qurbany bolǵan Altynbek Sársenbaıulynyń esimi erekshe.

Altynbek Sársenbaıuly – sheshe jaǵynan Álmerek abyzǵa jıen, ózi Raıymbek Hangeldiniń záýzaty. Eki asyldan týǵan asylman. Altynbekti kózi qaraqty qaýym áýeli adam balasy jutynyp oqıtyn gazetter shyǵarýshy jýrnalıs, isker maman, keıin aqparat mınıstri, sońynda qysastyq kórip, qazaǵa ushyraǵan ult janashyry retinde biledi.

Iá, Altynbek taqyryby – aýyr taqyryp. Munda búkil ulttyq tragedıa jatyr. Bul taqyryptyń artynda qazaqtyń talqandalǵan taǵdyry jatyr. Bul taqyryp – názik, shikámshil, kirpıaz. Túlkibulańǵa salmaı, aqıqat týyn qadap jazý – naǵyz qalamgerdiń hám ultym degen azamattyń ǵana qolynan keledi.

Ultty kúıretý de, pushpaqqa shyǵarý da adamdardyń nıetinen. Altynbek Sársenbaıulynyń nıeti erek, kirshiksiz, móldir edi…
Ol tunshyǵyp bara jatqan tilimizdi bosatýdy nıet etti, egemendigimizdiń qyzyǵyn ózimizge kórsetýdi nıet etti, baqýatty, eldi rýhanı kúıreýden saqtaýdy nıet etti. Sonyń jolynda tizgin tartpaı, ult úshin kózsiz erlikterge bardy.

Ult tamyrsyzdana bastady. Asharshylyq, qýǵyn-súrgin, 70 jyl bodandyq, 30 jyldyq júıeden halyqtyń sanasy da, ulttyq qundylyǵy da, hál-aqýaly da degredasıaǵa ushyrady. Altynbek ulttyń boıyna «eńseni tikteý kerek» degen ıdeologıany sińire bastady.

BAQ-qa tusaý, noqta salǵan shaqta Sársenbaıuly aqparat mınıstrligine sátti kelip, sapaly, ulttyq deńgeıdegi gazet-jýrnaldardy alǵy shepke shyǵardy. «Karavandy» ysyryp, dúńgirshekterge qazaq basylymdaryn qoıdy.

Sóıtip júrgende Altynbek júıeniń júgensizdigin ańǵardy. Egemendimizdiń máselesin qolǵa ala bastaǵanda sheıit boldy.

Al biz she? Biz ne istedik? Biz ókindik... Shyndyqtyń shyńyraýda qalǵanyna ókindik. Kóp nársede keshikkenimizge ókindik. Áli ókinip kelemiz.

Endi ókine bermeı, áreket etý kerek. Jastar qyzyldy-jasyldy qaýymdy emes, ult úshin janyn bergen iri tulǵa Altynbek Sársenbaıulyn úlgi etýi kerek.

Búgin Altynbek Sársenbaıulynyń dúnıeden ótkenine 18 jyl boldy. 18 jylda biz ne isteı aldyq?

Tipti júrgen jerimizde qazaqsha sóıleı alyp júrmiz be? Álde Altynbektiń atyna kóshe, mektepter berip, rýhyn bir aýnatyp túsirdik pe?

Altynbektiń aýyr taǵdyry týraly spektáklder qoıý qolymyzdan kelmeı me?

Bálkim, sonda Altynbektiń rýhy bizdi keshirer…

Bálkim, sonda qazaqtan júzdegen Altynbekter shyǵar. Bálkim, «Jańa Qazaqstan» osydan bastalar?