20 naýryz kúni saǵat 12:00-de eldiń barlyq bilim berý uıymdarynda bir mezette ulttyq kúı oınaıdy. Bul týraly Oqý aǵartý mınıstrligi habarlady.
Mınıstrlik shara óskeleń urpaqtyń boıynda rýhanı-adamgershilik qundylyqtar men patrıottyq sezimderdi qalyptastyrýǵa, eldiń mádenı murasyn jalǵastyrýǵa, balalar arasynda dombyrada oınaýdy nasıhattaýǵa baǵyttalǵanyn atap ótti.
– Dombyrashylar chellendjiniń maqsaty – balalar men jastardyń, muǵalimder men ata-analardyń mýzykadaǵy shyǵarmashylyq jetistikterin kórsetý jáne dombyrany dáripteý. Sharaǵa barlyq nıet bildirýshiler qatysa alady. Bul chellendj byltyr alǵash ret ótti. Dombyranyń kúmbirlegen úni bir ýaqytta barlyq bilim berý uıymdarynda oınady. Bul elimizdiń mádenı ómiri úshin eleýli oqıǵa. Sharalar "Birtutas tárbıe" baǵdarlamasy aıasynda ótkiziledi, – deıdi tárbıe jumysy jáne qosymsha bilim berý departamentiniń dırektory Merýert Medetbekova.
Mınıstrlik sonymen qatar bıyl Naýryz meıramy barlyq jalpy bilim beretin mektepterinde 14-23 naýryz aralyǵynda ótetinin jetkizdi. Osy kúnderi taqyryptyq chellendjder, jalpyulttyq ekologıalyq aksıa jáne ulttyq oıyndardan túrli jarystar uıymdastyrylmaq.
Pikir qaldyrý