Pýtınniń Ýralsk federaldyq okrýgindegi ókili Vladımır Iakýshev Reseıdiń Kýrgan, Túmen oblystaryndaǵy sý tasqynyn Qazaqstanmen baılanystyrdy. Bul týraly ol RBK basylymyna bergen suhbat barysynda aıtty.
Onyń sózinshe, eki oblystaǵy tasqyn máselesin sheshý úshin Qazaqstan sý qoımalary júıesindegi sý jiberý máselesin Reseımen aqyldasyp otyrýy kerek.
Vladımır Iakýshevtyń bul málimdemesi soqtyǵýǵa qara tappaı otyrǵan arandatýshynyń áreketine uqsaıdy. Óıtkeni ol aıtyp otyrǵan oblystardy basyp ótetin Tobyl ózeniniń aǵysy Qazaqstannan emes, Reseıden bastalady.
Sý resýrstary jáne ırrıgasıa mınıstrligi Qazaqstan Reseıdegi sý tasqynyna áser etedi deý shyndyqqa janaspaıtynyn málim etti.
"Tobyl ózeniniń boıyndaǵy sý Reseıden keledi. Tıisinshe, sý jiberý týraly sheshim Reseı tarapynan keletin aǵynǵa saı qabyldanady. Sondyqtan, Qazaqstan Reseıdegi sý tasqynyna áser etedi dep aıtý durys emes. Bul shyndyqqa janaspaıdy. 2 sáýirden bastap Qazaqstan jaǵy Reseı tarapyna Tobyl ózeni boıynsha sý ótkizý jónindegi sheshimder týraly aqparat berip otyr. Taraptar táýlik boıy sý aǵynynyń ulǵaıýyna nemese azaıýyna qaraı málimet almasady. Sol sebepti kez-kelgen kelisilmegen áreket týraly sóz joq" dep habarlady mınıstrlik.
Reseı shendileriniń Qazaqstan týraly daýly málimdemeleri tyıylmaı tur. Jýyrda ǵana memlekettik dýma depýtaty Andreı Lýgovoı Qazaqstan týraly "Patshanyń jeke dushpany. Qazaqstan buralańy" atty derekti fılm jaryqqa shyǵaryp, Qazaqstandy "anglosakstar baqylaýyndaǵy el", "rýssofobıa mekeni" dep pikir bildirgen. Ýkraına men Qazaqstandy salystyra kele ol "eldi aǵylshyndar bılep tur, olardyń negizgi maqsaty – orys qazaq arasyna ot jaǵý" deıdi.
Pikir qaldyrý