Almatyda brıtan ınjeneri Nelson Felldiń «Rýsıa hám kóshpeliler. Qazaq dalasy týraly hıkaıalar» kitaby jaryq kórdi. Bul kitaptyń jaryqqa shyǵýyna belgili baspager Baqytjan Buharbaı men mesenat Dýlat Tastekeı sebepker boldy.  

Byltyr jyl sońynda kásipker ári belgili qoǵam qaıratkeri Dýlat Tastekeı: «Baqytjan, bir kitapty birlesip shyǵaraıyq» degen usynys tastaǵan bolatyn. Dýlat aǵam jetekshilik etetin Assyltas qorynyń qoldaýymen 1905 jyly qazaq dalasyna kelip, qazirgi Qaraǵandy oblysyndaǵy mys kenishterin satyp alyp, mys qorytý zaýytyn basqarǵan brıtan kásipkeri Felldiń tańǵajaıyp etnografıalyq jazbalaryn tuńǵysh ret qazaq jáne orys tilderine aýdaryp shyǵaryp otyrmyz. Bul eńbek alǵash ret 1916 jyly London jáne Nú-Iorkta basylǵan – dedi B. Buharbaı.

Týyndy 1905 jyly Orys-japon soǵysy órship, revolúsıalyq terbelis jaǵdaıynda turǵan Reseı ımperıasynyń quramyndaǵy qazaq dalasynda ornalasqan kenishterdiń birin satyp alǵan brıtan taý-ken ınjeneri, «Spassk mys kenderi» ásipornynyń basqarýshysy Nelson Felldiń Dala ólkesinde ótken jyldary týraly estelikteri qarapaıym baıandaý tilimen jáne shynaıylyǵymen oqyrmandy birden baýraıdy. Dala halqynyń erekshe bolmysy, tabıǵatpen úılesimdi ómir súrýi, rıasyz peıili, dástúr ǵuryptary Batys órkenıetiniń ókiline erekshe tartymdy kórinip, qyzyqty áńgimelerine arqaý bolady. Avtordyń kórgen-bilgenderin sol kezdegi kóshpelilerdiń turmysyn etene tanytatyn etnojazbalar deýge ábden laıyq.