29 sáýir kúni Qordaı aýdany, Betqaınar aýyldyq okrýgine qarasty Soǵandy aýylynda Memleket basshysy Q.K.Toqaevtyń «Taza Qazaqstan» atty 5 aptalyq respýblıkalyq  ekologıalyq aksıasy aıasyndaǵy «Ónegeli urpaq» taqyrybynda aýdan jastary Mambetalıevter otbasylyq baqshasyna jemis aǵashtaryn otyrǵyzyp, kógaldandyrý jumystaryn júrgizdi

Jastardyń maqsaty – Prezıdenttiń bastamasyna qoldaý kórsete otyryp, ózge de turǵyndardy tazalyq aksıasyna atsalysýǵa shaqyrý, qarttarǵa qamqorlyq, qurmet kórsetý. Osy rette jastar qoldaryna kúrekterin ustap, jemis aǵashtaryn egip, qarıanyń baqshasyn tazalap berdi.

– Men osyndaı meırimdi jastardyń baryna qýanamyn. Búgin kóktemniń shýaqty kúninde úıge kelip jyly sózderin aıtyp, úı sharýasyna kómektesip, aýlamdy jáne baqshamdy tazalap berdi. Jastarmen birge shaı iship, kóńilim kóterilip qaldy. Osyndaı aksıalar jıi uıymdastyrylyp tursa eken deımin. Elimizde kómekke muqtaj jandar bar. Jasymyz kelgennen keıin úı sharýasyna jaramaımyz, - deıdi baǵban G.Mambetalıev.

Óz kezeginde belsendi jastar qarıalarǵa kómek kórsetý óskeleń urpaqtyń paryzy ekenin atap ótip, osyndaı izgilikti ister ózge de eldi mekenderde uıymdastyrylsa degen tilegin de jetkizdi.

QR Prezıdentiniń tapsyrmasyna sáıkes, elimizde «Taza Qazaqstan» atty bes aptalyq respýblıkalyq ekologıalyq aksıasy aǵymdaǵy jyldyń 11-i sáýirinen bastaldy. Aýdanda aksıaǵa 2300 adam men 35 mekeme jumysshylarymen qatysty, 7 birlik tehnıka qatysyp, 300 aýla tazalandy, jumystar qorytyndysymen 40 000 t. qoqys shyǵaryldy.

«Jasyl aımaq» baǵdarlamasy aıasynda 2500 adam men 30 mekeme jumysshylary qatysty. 5 birlik arnaıy tehnıka jáne 1300 aǵash otyrǵyzyldy, onyń ishinde 150 aǵash qaıta otyrǵyzyldy.