Bıyl Reseıde adyraspan tyıym salynǵan ósimdikter qataryna engizilip, adyraspan tasymaldaǵan adamdar qylmystyq jaýapkershilikke tartylady. Soǵan baılanysty QR İshki ister mınıstrligi el azamattaryna Reseıge adyraspan alyp barýǵa bolmaıtynyn eskertti.

"Bıyl aqpan aıynan bastap Reseı Federasıasynda garmala degen ósimdik, ıaǵnı jalpaq tilmen aıtqanda "adyraspan" tyıym salynǵan ósimdikter qataryna engizildi. Ony sol elge aparǵany úshin qylmystyq jaýapkershilik qarastyrylǵan. 1 mıllıon rúblge deıin aıyppul nemese 7 jylǵa deıin bas bostandyǵynan aıyrý jazasy eskerilgen", — dedi İshki ister mınıstrliginiń resmı ókili Shyńǵys Alekeshev aptalyq brıfıńide.

Ózgertýlerge sáıkes kórshi elge asa iri mólsherde adyraspan aparǵandar 15 jyldan 20 jylǵa deıin bas bostandyǵynan aıyrylýy múmkin.