Pikirsaıys qozǵalysy retinde elimizde úzdik chempıondar ortasyna aınalǵan “Tańdaýly Ekonomıster Odaǵy” Joǵarǵy Pikirsaıys Mektebine bıyl 20 jyl. Osyǵan oraı 4-5 mamyr kúnderi Narhoz ýnıversıtetinde TEO CUP XIII pikirsaıys týrnıri ótti. Oǵan elimizdiń 9 oblysynan 300 qatysýshy men 1500-ǵa jýyq kórermen keldi.

Týrnırdegi basty talap - qoǵamda bolyp jatqan ózekti máseleler men olardyń tıimdi sheshý joldaryn talqylaý. Ol jerde mektep oqýshylary men stýdentter memlekettik tilde álemdik deńgeıde keń qoldanysqa ıe BPF (Brıtandyq Parlamenttik Format), APF (Amerıkandyq Parlamenttik Format) jáne LD (Lınkoln Dýglas) formattarynda pikirsaıysqa tústi.

Týrnır nátıjesi boıynsha Jazıra Jónderbek pen Inkarov Erǵalı stýdenttik lıganyń álfa lıgasynda 200-ge jýyq qatysýshysynyń arasynda úzdik atanyp APF jáne LD formattary boıynsha birinshi jáne ekinshi orynǵa ıe boldy. APF boıynsha “Han Táńiri” fraksıasynan Azamat Arynov pen Áset Orazǵalı ekinshi oryn, “Jambyl” fraksıasynan Ábýǵalı Erǵalı men Tursynaly Dýlat jáne “Argýment” fraksıasynan Ongarov Nurjan men Abenov Ahmetjan úshinshi oryndardy ıelendi.

Al mektep lıgasynda LD formatynda eń úzdik spıker atanǵan Taıtanova Dıanaǵa JOO High School-dan bir jyldyq grant tabystaldy, al úzdik spıker atanǵan Baqytbek Aqbotaǵa, APF formatynda birinshi oryn alǵan "Nagato men Mınato” fraksıasynan Djýmadın Erasyl, Qýanyshbek Bekjanǵa, ekinshi oryn ıelengen “Shym shide street” fraksıasynan Ázimhan Bekarys, Ádilbaı Ratjanǵa, úshinshi oryn utyp alǵan “Ǵumyrdan da uzaq kún” fraksıasynan Koıshıeva Araılym men Tabynbaeva Nurdanaǵa, “Dope Soz” fraksıasynan Zaıdýllaeva Araılym men Askarova Anelge aqshalaı syılyq tabystaldy.

2004 jyly qurylǵan TEO JPM uıymy búginde jastardy damytý maqsatynda ózindik úlesin qosyp kele jatqan uıymdardyń biri. Qazaqstannyń túpkir-túkpirinen jınalyp osy ortadan shyqqan 300-ge tarta túlek elimizdiń ekonomıkalyq damýy jolynda eńbek etýde.

Bolashaq baǵdarlamasymen 13, basqa  granttarmen 5 TEO JPM túlegi shetelde bilim alǵan. Olar University of Toronto, Canada, University of Liverpool, Pensylvania State University, London School of Economics, New York University, Brunel Univeristy, University of Warwick, University of East Anglia, University of Leicester, University of Surrey, Alanya Alaaddin Keykubat University syndy álemniń úzdik ýnıversıtetterinde oqyp, qazirgi tańda túrli salalarda jemisti eńbek etýde.

TEO CUP XIII pikirsaıys týrnıriniń uıymdastyrý komıteti