Almaty oblysynda áıel bes jasar balany kólikpen qaǵyp óltirdi. Qaıtys bolǵan balanyń týysynyń aıtýynsha, qaıǵyly oqıǵa 10 mamyrda kúndizgi saǵat 4-ter shamasynda marqum bala turatyn Saımasaı aýylyndaǵy úıdiń mańynda bolǵan.

"Bala jol jıegindegi qumda oınap otyrǵan. Ol jyldam kele jatqan, onyń ústine telfon qarap otyrǵan. Ol dál bala otyrǵan jerge jol jıegine shyǵyp qaǵyp ketken! Sosyn ol oqıǵa ornynan ketip qalmaqshy bolǵan, kórshilerdiń balalary munyń bárin kórgen, ony solar toqtatty. Oqıǵadan keıin ol kólikten de túspedi", - deıdi Zarına Qambarova.

Týystarynyń aıtýynsha, bala birden mert bolǵan. Alaıda jol apatynan keıin áıeldi eshkim ustamady, deıdi olar.

"Ol tipti ata-anasyna da kelmedi, keshirim suramady. Ol kinásin moıyndamaıdy. Jol-kólik oqıǵasynan keıin ony eshkim saraptamaǵa aparǵan joq. Qyzmetkerler kóliktegi qandy súrtip tastaǵan, balanyń aıaq kıimderin múldem basqa jaqqa aparyp qoıǵan. Jol shetinde emes, jolda bolǵandaı etip syzyp qoıǵan", - dedi qaıtys bolǵan balanyń tátesi.

Olardyń aıtýynsha, kólik júrgizgen áıel mektepte muǵalim bolyp jumys isteıdi.

Almaty oblysynyń Polısıa departamenti 10 mamyrda Saımasaı aýylynda adam ólimimen aıaqtalǵan jol-kólik oqıǵasy bolǵanyn rastady.

"Opel Astra kóliginiń júrgizýshisi jolǵa júgirip shyqqan balany qaǵyp ketti. Kámeletke tolmaǵan bala esin jımaı, aýrýhananyń jansaqtaý bóliminde kóz jumdy. Kólik júrgizýshisi ýaqytsha ustaý ızolátoryna qamaldy", - dep habarlady polısıa.

Jol-kólik oqıǵasyna qatysty qylmystyq is qozǵaldy. Qajetti saraptamalar taǵaıyndaldy.