Talas aýdanynda Jambyl oblysy QHA Ǵylymı-saraptamalyq tobynyń «Óńirimizdegi etnostardyń birtutastyǵyn saqtaý jáne nyǵaıtý» taqyrybyndaǵy keńeıtilgen otyrysy ótti.

Otyrystyń maqsaty – ǵylymı-saraptamalyq top músheleriniń qoǵamdyq kelisim men jalpyulttyq birlik salasyndaǵy memlekettik saıasatqa sáıkes óńir turǵyndary arasynda birlik pen biregeılikti nasıhattaý, jas urpaqty tárbıeleýdegi ozyq tájirıbelerdi taratý.

Áýeli jıynda Ulttyq quryltaıdyń úshinshi otyrysynda kóterilgen basty máseleler men usynystar nazarǵa alynyp, jıynǵa qatysýshylar ár túrli salalar boıynsha oı-pikirlerimen bólisti.

Sondaı-aq, jýyrda Qazaqstan halqy Assambleıasynyń «Birlik. Jasampazdyq. Órleý» atty HHHİİİ sesıasy ótken bolatyn. Onda Memleket basshysy Qasym-Jomart Toqaev «basty mindetimiz – qoǵamda bir-birimizge degen ózara qurmet pen senimdi nyǵaıtyp, dinı, aımaqtyq nemese áleýmettik-ekonomıkalyq alshaqtyqty boldyrmaý úshin barshaǵa ortaq jańa qaǵıdattar men ustanymdar oılastyrý qajet» – degen edi.

​Basqosýda M.H.Dýlatı atyndaǵy Taraz óńirlik ýnıversıtetiniń «Fılosofıa jáne saıasattaný» kafedrasynyń aǵa oqytýshysy, oblystyq QHA janyndaǵy Ǵylymı-saraptamalyq tobynyń múshesi Rejep Baıarısov «Etnostar birligin saqtaýda qazaq halqynyń toptastyrýshylyq áleýetiniń mańyzy» taqyryby tóńireginde baıandama jasady: – Qazaq eliniń taǵdyry taýqymetke toly bolǵanmen, eshqashan ózgeni ózeginen teppegen. Elimizde etnosaralyq jáne konfesıaaralyq yntymaqtastyq, kelisim men saıası turaqtylyqty saqtaý isine jiti kóńil bólinýde. Qazaq halqy qaı zamanda da eldikke, sonyń ishinde el berekesiniń turaqty bolýyna úlken nazar aýdarǵan. Sondyqtan da bolar, el aýzynda: «Birlik bar jerde tirlik bar», «Birliksiz el tozady, birlikti el ozady» degen naqyl sózder qaldy. Bul –búgingi táýelsiz Qazaqstannyń basty qaǵıdasyna aınaldy jáne táýelsizdiktiń negizi, – dedi Rejep Orazbaıuly óz baıandamasynda.

​Budan keıin sóz alǵan Taraz qalalyq Ózbek etnomádenı birlestiginiń tóraǵasy, oblystyq QHA Aqsaqaldar keńesi tóraǵasynyń orynbasary, top múshesi Abdyrahman Zaınýtdınov aımaqtaǵy etnosaralyq saıası ahýal týraly keleli oılaryn ortaǵa saldy. Qatysýshylar Memleket basshysy Q.Toqaev óz sózderinde qozǵaǵan mańyzdy baǵyttar boıynsha oı-pikirlerimen bólisti.