"Jalǵan aqparattardyń aldyn alý jáne anyqtaý maqsatynda BAQ pen áleýmettik jelilerge únemi monıtorıń júrgiziledi. Monıtorıń barysynda jalǵan jáne teris aqparat taratýdyń 41 faktisi anyqtalyp, olardy ókiletti organdar teriske shyǵardy. Jalǵan aqparat taralýynyń 6 derekkózi anyqtaldy. Olar boıynsha onlaın-platforma ıeleriniń atyna zańǵa qaıshy materıaldardy joıý týraly talappen habarlandyrý jiberildi", - dedi úkimet basshysy.

Ol mundaı habarlamalar sý tasqynyna qatysty jalǵan aqparat taratýshylardy ákimshilik jaýapkershilikke tartý máselesin qarastyrý úshin ishki ister mınıstrligine  jiberiletinin aıtty.

"Jalǵan aqparattardyń basym bóligi messendjerlerde feık habarlamalardyń taratylýymen baılanysty. Jalǵan aqparat ornalastyrǵany úshin 29 adam (6 adam tutqyndaldy, 2 fakti boıynsha sotqa deıin tergeý júrgizilip jatyr, qalǵandaryna aıyppul salyndy) jaýapqa tartyldy. Bunan bólek, zańǵa qaıshy sıpattaǵy 92 jarıalanym quqyqtyq baǵa berý úshin bas prokýratýraǵa jiberildi. Atalǵan materıaldardy jarıalaǵan áleýmettik jeli qoldanýshylarmen profılaktıkalyq áńgimelesý júrgizildi", - dedi Oljas Bektenov.