Kelisimge sáıkes, reseılik tarap bul jumysty júrgizýge jeńildikpen qaryz berý múmkindigin qarastyrady. Jobany iske asyrý boıynsha Qazaqstan tarapynan «Samuryq-Energo» jáne Reseı tarapynan «INTER RAO — Eksport» jaýapty bolyp belgilengen.
Taraptar JEO qurylysynyń barlyq prosesin úsh kezeńge bóldi.
Birinshi kezeń - JEO-ny keıinnen kómirden tabıǵı gazǵa aýystyrý múmkindigin eskerip, úsh jobanyń árqaısy boıynsha qajetti saraptamalar júrgizip, jobalaý qujattamasyn ázirleýdi qamtıdy. Bul kezeń «Samuryq-Energo» esebinen júzege asady.
Ekinshi jáne úshinshi kezeńderde qajetti jabdyqtardy jetkizý, generasıalaıtyn jabdyqtar men gaz tazartý júıelerin salý-montajdaý jáne iske qosý-jóndeý jumystary josparlanǵan. Sonymen qatar qazaqstandyq tarap Reseı eksporttyq uıymnan «Samuryq-Energo» kepildigimen jáne tapsyrys berýshi quqyqtarynyń kepilimen JEO salýǵa nesıe ala alady.
«Reseı tarapy Reseı Federasıasynyń zańnamasyna sáıkes, eksportty memlekettik qoldaý tetikteriniń talaptaryn saqtaı otyryp, reseılik qarjylandyrý uıymdary usynatyn nesıeler boıynsha reseılik óndiristiń joǵary tehnologıalyq ónimderin, kelisimsharttar boıynsha jumystar men qyzmetterdi jetkizýdi qarjylandyrý maqsatynda jeńildetilgen (sýbsıdıalanǵan) paıyzdyq mólsherlemelerdi usyný múmkindigin qarastyrady», — dep jazylǵan kelisimde.
Energetıka mınıstrligi JEO salý jumystary ratıfıkasıalaý rásimi aıaqtalǵannan keıin ǵana bastalatynyn atap ótti.
Pikir qaldyrý