Tıisti qaýlyǵa Premer-mınıstr Oljas Bektenov qol qoıdy.

Oblystardyń, respýblıkalyq mańyzy bar qalalardyń jáne Astananyń búdjetterine 351 myńnan astam dozasy mólsherinde vaksına satyp alý úshin  9,7 mlrd teńgeden astam qarajat aýdarylady.

Adam papıllomasy vırýsynan týyndaǵan jatyr moıny obyry (JMO) – álemdegi eń kóp taralǵan qaterli isikterdiń biri. Atalǵan vırýs anyqtalǵan barlyq jaǵdaıdyń qurylymynda 13,1%-ǵa deıin kezdesedi. Jyl saıyn odan 300 myńǵa jýyq áıel kóz jumady.

Qazaqstanda jatyr moıny obyry barlyq jastaǵy áıelder arasynda qaterli isiktiń basqa túrleri ishinde taralýy boıynsha ekinshi orynda tur. Al jyl saıyn respýblıka boıynsha 1900-ge jýyq jańa jaǵdaı tirkeledi, 600-den astam áıel osy patologıadan qaıtys bolady.

«APV-na qarsy jáne JMO damýymen kúresýdiń jalǵyz ádisi – vaksınasıa. Ulttyq vaksınasıa kúntizbesine sáıkes jáne Dúnıejúzilik densaýlyq saqtaý usynymyn eskere otyryp, APV-ǵa qarsy ekpe salý 11 jastaǵy qyzdarǵa 6 aı aralyq merzimmen eki ret júrgiziletin bolady. Bul rette Qazaqstanda APV-nyń neǵurlym onkogendi túrlerinen (6, 11, 16, 18) qorǵaıtyn tórt valentti vaksına qoldanylady», delingen Úkimet habarlamasynda.